2016 წლის საბავშვო ევროვიზიის ქართველმა გამარჯვებულმა, მარიამ მამადაშვილმა ნიუ იორკში, შოუში – knicks talent search გაიმარჯვა.
კონკურსი Madison Square garden-ში მიმდინარეობდა. მამადაშვილმა ბილი ჯოელის სიმღერა New York State of Mind შეასრულა.
შეგახსენებთ, რომ 2016 წლის 20 ნოემბერს, მალტის დედაქალაქ ვალეტაში, მარიამ მამადაშვილი გახდა საბავშვო ევროვიზია 2016-ის გამარჯვებული, სადაც ის საქართველოს წარადგენდა სიმღერით „მზეო“.
მარიამი ოთხი წლიდან მღერის. სწავლობდა „ბზიკების სტუდიაში“ და ევგენი მიქელაძის სახელობის თბილისის ცენტრალურ სამუსიკო სასწავლებელში. 2015 წლიდან ცხოვრობს ამერიკის შეერთებულ შტატებში და სწავლობს ბროდვეის მეთოდურ აკადემიაში.
საბავშვო ევროვიზიის სიმღერის რიგით მე-14 კონკურსზე მარიამმა 239 ქულა მოიპოვა. მეორე ადგილზე აღმოჩნდა სომხეთის წარმომადგენელი, 232 ქულით, ხოლო მესამე ადგილი იტალიამ დაიკავა, 209 ქულით.
საქართველო საბავშვო ევროფესტივალის გამარჯვებული 2016 წელს მესამედ გახდა და საბავშვო ევროვიზიის გამარჯვებულ ქვეყნებს შორის რეკორდი დაამყარა. მსგავსი შედეგი ამ დრომდე არც ერთ ქვეყანას ჰქონია.
