მაია ასათიანი რადიო „ფორტუნა პლუსის“ გადაცემას „ვიზიტორი“ ესტუმრა და გიგა ბატკუაშვილის მიერ დასმულ არაერთ შეკითხვას უპასუხა, მათ შორის, პირადი ცხოვრების შესახებაც. მაიამ აღნიშნა, რომ ერთადერთი რადიოსადგური, სადაც სტუმრად დადის, რადიოჰოლდინგი „ფორტუნაა“ და რადიოს ერთადერთი ჟურნალისტი, ვისთანაც გულახდილობის ხასიათზე დგება, სწორედ გიგა ბატკუაშვილია.
გთავაზობთ მოკლე ამონარიდს გადაცემიდან:
ხშირად იწერებოდა, რომ მაია ასათიანი ორსულად იყო. ალბათ, ბევრი რამ კეთილი განზრახვითაც იწერებოდა, გაგათხოვეს, სიყვარულის ამბებიც დაწერილა…
მაგრამ არც ერთი სიმართლე არ ყოფილა…
იმასაც ამბობენ, რომ შენს ცხოვრებაში არსებობს მილიონერი ბიზნესმენი, რომელმაც პარფიუმერიის ეს ხაზი შეგიქმნა…
(იცინის) ვინც უნდა იდგეს ჩემ გვერდით, სულ რომ მილიარდერი იყოს, მას ერთ კაპიკსაც არ გამოვართმევ. ჩემი შრომით მოპოვებული სარჩო მირჩევნია. ამის მიხედვით არ ვარჩევ ადამიანებს. მე ის ქალი არა ვარ, მეგობრებო. ეს რომ მდომებოდა, ასეთი კატორღული შრომაც არ მომიწევდა, ბევრად ადრე დავბინავდებოდი. პირად ცხოვრებაზე საუბარი ავუკრძალე ჩემს თავს. ახლა მაქვს ამის უფლება. როცა „პროფილის“ წამყვანი ვიყავი, მე თვითონ ვსვამდი ამ კითხვებს და მერიდებოდა, რომ არ მეპასუხა. თუ მილიონერზე ასეთი ჭორია, ეს არის სიცრუე. რაც შეეხება ჩემს სტარტაპს, სულ მინდოდა, თავის მოვლის ხაზი მქონოდა. თუ ტელევიზიისნაირად რამე ვიცი, ეს არის თავის მოვლის თემები. სარბენ ბილიკზე ჩქარი სიარულის დროს უცებ ამენთო… დავიწყე ბიზნესის სწავლა და იმაზე მუშაობა, როგორ შემექმნა. საწყისი კაპიტალი არ მქონდა, კრედიტი არ მომცეს, რადგან უმუშევარი ვიყავი. რაც ოქრო მქონდა, ყველაფერი ჩავაბარე, მხოლოდ ერთი ბეჭედი დავიტოვე, რადგან ეს ის ბეჭედია, რომელიც მინდოდა, ნუცასთვის მეჩუქებინა ა და გასაყიდად ვერ გავიმეტე. ჩემი პირველი პროდუქტი რომ დავიკავე ხელში, ძალიან ვღელავდი. იმავე საღამოს ყველა ფლაკონი გაყიდული იყო. გავაკეთეთ შრატი, თვალის კრემი, ახლა უკვე სამი ხაზი გვაქვს, გვყავს თანამშრომლებიც. შენთან ინტერვიუს შემდეგ ვიფიქრე, რომ მამაკაცის ხაზიც უნდა გავაკეთო. შავ ფლაკონში იქნება, ოქროსფერი ხაზებით, თუმცა ეს საკითხი ჯერ კარგად უნდა შევისწავლო.
