იტალიელი კომპოზიტორი და დირიჟორი, რომელიც მსოფლიო ტურნეთი 60-წლიან შესანიშნავ მუსიკალურ კარიერას აღნიშნავს, საქართველოს ეწვია. 18 მაისს ის ბათუმის აეროპორტში ჩაფრინდა და შეკვეთილის სასტუმროსკენ აიღო გეზი. 121-კაციან გუნდთან ერთად, სადაც მსოფლიოს ერთ-ერთი საუკეთესო, რომის სიმფონიური ორკესტრის შემადგენლობაც შედიოდა, „პარაგრაფში“ დაბინავდა. მაესტრო მორიკონე საქართველოში მეუღლესთან ერთად ჩამოვიდა, რომელსაც ჩვენი ქვეყნის შესახებ უამრავი შეკითხვა ჰქონდა, ანბანით დაწყებული, ისტორიით დასრულებული. თავად მაესტრო ძალიან მოიხიბლა შეკვეთილის ბუნებითა და ზღვით, მისი გუნდი კი „ბლექ სი არენას“ უსაზღვრო ტექნიკური შესაძლებლობებით, მით უმეტეს, რომ არენის გუნდმა ურთულესი ტექნიკური მოთხოვნების სია სრული სიზუსტით შეასრულა და უცხოურ მხარეს სასაყვედურო არაფერი დაუტოვა.
კონცერტის რეპერტუარი თავად მაესტრომ შეარჩია. ცნობილია, რომ ის, როგორც ყველა დიდი ხელოვანი, თავისებურებებით გამოირჩევა. ერთ-ერთი კი ისაა, რომ ენიო მორიკონეს პრინციპული დამოკიდებულება აქვს კონცერტებზე რეპერტუარის არჩევისას და ამას მხოლოდ საკუთარი ინიციატივით აკეთებს. ქართველი მსმენელისადმი გამოგზავნილ მიმართვაში 90 წლის მუსიკოსმა საგანგებოდ გაუსვა ხაზი იმას, რომ რეპერტუარის ყველა კომპოზიცია თავად შეარჩია დიდი დაკვირვებით და კონცერტზე მსმენელი მოისმენდა როგორც მისთვის ნაცნობ, ასევე შედარბეით უცნობ ნაწარმოებებსაც კინოფილმებიდან.
საგულისხმოა, რომ „ბლექ სი არენას“ დიდ სცენაზე ენიო მორიკონესა და რომის სომფინიურთან ერთად ქართველებიც გამოვიდნენ, თბილისის ოპერისა და ბალეტის გუნდი 70-კაციანი შემადგენლობით, რომელსაც მაესტროს პირადი მუსიკალური ასისტენტი, სტეფანო კუჩი ხელმძღვანელობდა.
კონცერტი ორი განყოფილებისგან შედგებოდა. რეპერტუარში შედიოდა ენიო მორიკონეს ნამუშევრები: The Legend of 1900, Bugsy, H2S, Uno che grida amore, Baaria, Tarantella, Nostromo, Tropical Variation, Silver of the mine, The man with the armonica, The fortress, The good, the bad and the ugly, The Ecstasy of the gold, Nuovo Cinema Paradiso, Luz Prodigiosa, The battle of Algeris, Sacco and Vanzetti, Investigation of a citizen above suspicion, Sostiene Pereira, The working class goes to heaven, Casualties of war, Abolicao, Gabriel’s oboe, Falls, On Earth as it is on Heaven.
მაესტრო მორიკონეს გვერდს უმშვენებდა ორი ბრწყინვალე მომღერალი, სოპრანო Susanna Rigacci და ფადოს შემსრულებელი, Dulce Pontes, რომელმაც დარბაზის განსაკუთრებული აღფრთოვანება გამოიწვია.