თამთა ჭელიძისა და ჯაბა კილაძის გოგონამ, ლიზამ, სამოდელო კარიერა ნინო ცქიტიშვილის სააგენტოში დაიწყო და მასთან კონტრაქტიც გააფორმა. ლიზა ფსიქოლოგიის განხრით საზღვარგარეთ გეგმავს სასწავლებლად გამგზავრებას, სააგენტო კი ელოდება, როდის გახდება ის 16 წლის, რომ რამდენიმე ქვეყნის შეთავაზება განიხილოს მის სამოდელო კონტრაქტებთან დაკავშირებით.
დედა-შვილი ერთად გადავიღეთ და ჩავწერეთ, სპეციალურად fortuna.ge-სთვის.
დედები ძნელად ეგუებიან იმას, რომ შვილები გაიზარდნენ…
სულ ვემზადები და ვმუშაობ საკუთარ თავზე, ვიცი, რომ მალე შეიძლება საზღვარგარეთ წავიდეს სასწავლებლად, ასეთი გეგმა აქვს და რომ არ მოვკვდე, ერთი წელია, ამაზე ფსიქოლოგიურად ვმუშაობ (იცინის). ორი-სამი წელია ამბობს, რომ საზღვარგარეთ უნდა წასვლა, სკოლის მერე პირდაპირ უნდა ჩავაბარო საზღვარგარეთო.
ვიცი, რომ თავდადებული დედა ხარ…
ასეა და ძალიან გამიჭირდება. ლიზას გარეშე ერთი დღეც ვერ წარმომიდგენია. მინდა, დადებითი ემოციებითა და შემართებით გავუშვა და არა ტირილითა და ვაი-ვიშით (იცინის).
ლიზა, თამთა როგორი დედაა?
იმიტომ კი არაა კარგი დედა, რომ ყველაფერს მისრულებს, ადამიანურად ისე ვეწყობი და ისეთი ურთიერთობა მაქვს, ჩემი აზრით, სხვასთან ერთად ასე კარგად ვერ ვიქნებოდი. იმდენად მიწყობს ყველაფერში ხელს და იმდენად ესმის ჩემი, რომ ამის დაკარგვა არასდროს მინდა. ჩემთვის იდეალური დედაა. ჩემი აზრით, დედას რაღაცებზე პრობლემა უნდა ჰქონდეს და შვილს ყველაფერზე არ ეთანხმებოდეს, მაშინ ხომ არ მეცოდინება, რაში ვარ არასწორი და რა არ უნდა გავაკეთო. ამას ვამბობდი – იდეალურობა ეს არაა, იდეალურობა ისაა, რომ როგორც მეგობარი, ისე დამიჯდება, დამელაპარაკება, მეტყვის, რა არის უკეთესი, მეტყვის, რა არის ცუდი. რასაც მინდა, იმას ვუყვები და თავადაც მარიგებს ხოლმე.