თაკო დოლაბერიძეს საზოგადოება იცნობს, როგორც ივენთ-მენეჯერს, თუმცა ცხოვრების განმავლობაში ბევრ მისთვის უცნობ საქმეს შეჭიდებულია და წარმატებისთვისაც მიუღწევია.
ახლახან კი სასტუმროების მართვის საქმით დაინტერესდა და მთაწმინდაზე მდებარე სასტუმრო „ადამოს“ მენეჯმენტი აიღო საკუთარ თავზე. ფიქრობს, რომ საინტერესო საქმიანობას მოჰკიდა ხელი და აქაც წარმატების იმედი აქვს.
თაკო დოლაბერიძე:
ეს სფერო, სასტუმროების ბიზნესი, იგივე მომსახურების სფეროა და ახლოს არის სარესტორნო ბიზნესთან. სხვათა შორის, სულ მაინტერესებდა და არასდროს მეზარებოდა, რომ დამეწყო მუშაობა და მესწავლა. რადგან შემომთავაზეს, გადავწყვიტე, რომ სამუშაო რეჟიმში ავითვისო. მგონია, შევძლებ ამ საქმეშიც აღმოვჩნდე წარმატებული. ზოგადად, სულ მაინტერესებს ახალი რაღაცები. ჩემი მეგობრები მანიაკს მეძახიან. მეკითხებიან, რა ეტაპამდე შეიძლება ისწავლოო. ბევრი რამ წინ მიდის, ვითარდება, არის ბევრი სიახლე, რაც მე მაინტერესებს. ახალ საქმეში ძალიან მონდომებული ვარ და ვნახოთ, რა გამომივა.
საქმეს რომ იღებ, ბოლომდე ხარ ჩართული?
თუ საქმეს ხელს ვკიდებ, სხვისთვის დავალება არ მიყვარს. თუკი საქმე უნდა გამოვიდეს, მირჩევნია, მასში თავიდან ბოლომდე თავად ჩავერთო. თუკი არ ვარ, ხელს არ ვკიდებ, გამოცდილებამ მანახა, რომ ისე არასდროს გამოვა, როგორც მე მინდა.