სტეფანესთვის 2017 წელი სუპერწარმატებული გამოდგა. რამდენიმე ახალი ჩანაწერი გამოუშვა, კლიპებიც გადაიღო და 10-მდე სოლოკონცერტიც გამართა. წინასაახალწლო პერიოდი ძალიან დატვირთული აქვს, და მაინც… აპირებს, ახალ წელს სახლში შეხვდეს, რადგან 2016 წლის მიწურული ოჯახის წევრებთან ერთად გაატარა და 2017 წელი მისთვის შესანიშნავი გამოდგა.
სტეფანე:
2017 წელს გამოვცოცხლდი. წინა ორი წელი დეპრესიულად ვიყავი, არ ვმუშაობდი, ჩავიკეტე საკუთარი თავი. 2016 წლის ბოლო აღარ მინდოდა, ვყოფილიყავი ჩაკეტილი. უცებ, ბუფ და გაიხსნა, მაგრად წავიდა ყველაფერი. 2017 წლის ძალიან მადლობელი ვარ. შემოქმედებითად აქტიური წელი იყო, კორპორატიულსაც თუ ჩავთვლით, მეათე სოლოკონცერტი ჩავატარე. ჩემი კონცერტი მაინც შოუ გამოდის, რადგან ტექნიკური რაიდერის შესრულებას ზუსტად ვითხოვ, თუ შესაბამისი აპარატურა არ არის, არ ვთანხმდები. ბაქოშიც ძალიან ნაყოფიერად ვიმუშავე. ნონ-სტოპი მაქვს, რომელიც ახლაც გრძელდება.
31 დეკემბერის კონცერტზე მოგვიყევი…
31 დეკემბრის კონცერტი ჩემთვის მნიშვნელოვანია. „სფეისჰოლში“ იქნება განახლებული პროგრამით, ახალ სიმღერებსაც ვამატებთ, მუსიკოსებსაც. მაქვს დაწერილი ახალი სიმღერა, რომელიც გაზაფხულზე „გამოვარდება გარეთ“ (იღიმის). „სფეისჰოლი“ ძალიან კარგი სივრცეა, 2000 ადამიანი ეტევა. მათ არასდროს დაუთმიათ სივრცე ქართველი მუსიკოსისთვის. ახლაც „მუზამე“ აკეთებს ჩემს კონცერტს. პირველი 22 აპრილს იყო, დიდი დრო გავიდა უკვე (იღიმის). 12 საათზე ყველა შეხვდება ახალ წელს იქ, სადაც სურს, ორ საათზე კი დაიწყება ჩემი კონცერტი, რომელიც ოთხ საათამდე გაგრძელდება. თუკი ახალ სიმღერასაც მოავსწრებთ, მასაც შევასრულებთ.
ტექნიკური რაიდერი ახსენე, ანუ კონცერტის ჩატარებისას ითხოვ ზედმიწევნით მის შესრულებას?
მე ხმის რეჟისორ გიორგი გვარჯალაძესთან ერთად ვმუშაობ, რომელიც ძალიან მეხმარება და მის გარეშე, ფაქტობრივად, ვერაფერს ვაკეთებ. თუ ის აპარატურა არ არის იმ განლაგებით, როგორც მჭირდება, უარს ვამბობ. ძალიან ბევრჯერ ვთქვი უკვე უარი. არ მინდა კლუბის დასახელება, ორმაგ ჰონორარს მთავაზობდნენ, და ჩემი კონცერტი არ ღირს იაფი, მაგრამ როცა ხმა შევამოწმეთ, უარი ვთქვით. თუკი შენობას არ აქვს კარგი აკუსტიკა, დიდი თანხაც რომ შემომთავაზონ, არ დავთანხმდები. არც ისე ხშირია ჩემი კონცერტები და მოგეხსენებათ, ყველა ტელეფონით იღებს, მინდა, შესაბამისი ხარისხი იყოს.
