ოთო ფოლადაშვილი და ირინკა კავსაძე – „ცეკვავენ ვარსკვლავების“ ერთ-ერთი საუკეთესო წყვილია ამ სეზონზე. წინ პროექტის ნახევარფინალი და ფინალია. ირინკა და ოთო ყველა ჯერზე ახერხებენ მაყურებლის გაოცებას და შემდეგ ორშაბათსაც შეეცდებიან, ორიგინალური ილეთებით გააკვირვონ საზოგადოება.
კაფე „ორანჟერეას“ ეზოში, რომელიც ულამაზესად არის მორთული საახალწლოდ, წყვილმა სიამოვნებით იპოზიორა ჩვენი ფოტოკამერის წინ…
ერთ-ერთი ფავორიტი წყვილის ნომერსაც შეგახსენებთ: 0903300330.
ირინკა, ოთო სულ ასე აგვიანებს ყველა გადაღებაზე, როგორც დღეს?
(იღიმის) ოთო არის ძალიან დაკავებული ადამიანი, ხანდახან ხდება ხოლმე. ჯგუფები ჰყავს, რომლებსაც ამეცადინებს, თითო ლაივზე სამ ცეკვას რომ ასრულებს, ეს არ არის ადვილი, ამას ბევრი დრო მიაქვს.
ოთო:
გარდა ჩემი ცეკვებისა, ვვარჯიშობ ირინკასთან, სტუდიაში – ჯულიანასთან, ბავშვებს ვამეცადინებ და თან, უნივერსიტეტში მაგისტრატურაში ჩავაბარე, ბიზნესადმინისტრირების ფაკულტეტზე. მეტ რა გავაკეთო (იცინის)?!.
ირინკა, პირველი შთაბეჭდილება როგორი იყო, როცა ოთო შენს მეწყვილედ გამოაცხადეს?
ეს ძალიან საინტერესოდ მოხდა. ჩვენ ჯერ ჯგუფური რეპეტიციები გვქონდა, ყველა ერთად ვვარჯიშობდით დღის განმავლობაში. ერთ დღეს რაღაცას ვთამაშობდით, ყველა ერთად ოთახში დავდიოთ და ტაშს რომ დაუკრავდნენ, ვისაც პირველს დაინახავდი, მას უნდა ჩახუტებოდი. ხან ვის ჩავეხუტე, ხან – ვის. ბოლოს ოთო დავინახე და მასაც ჩავეხუტე. ჩვენმა ქორეოგრაფმა ჩაგვიარა, კარგია, გაიცანით ერთმანეთიო. იქ მივხვდით, რომ გადაწყვეტილი იყო ჩვენი ერთად ყოფნა.
ოთო, შენ ირინკასთან ერთად დგომა, ალბათ, გინდოდა…
თავიდან არავინ იცოდა, ვინ ვისთან ცეკვავდა. როცა ვუყურებდი კონკურსანტებს, ერთ-ერთი გამორჩეული იყო ირინკა. ძალიან მესიამოვნებოდა, რომ ის ყოფილიყო ჩემი მეწყვილე. ამ ჩახუტებებში რომ გამომჟღავნდა, ჩემი მეწყვილე იქნებოდა, მივხვდი, რომ მასთან ერთად კარგი ნომრების შექმნა შეიძლებოდა.
ირინკა, რა სირთულეები შეგხვდა პროექტში?
ყველანაირი (იცინის). ფსიქოლოფიური და ფიზიკური სირთულეებია. დღე და ღამ ვარჯიშობ და საკუთარ თავზე ნერვები გეშლება, როცა რაღაც არ გამოგდის. მე ასე ვარ, ყოველ შემთხვევაში. ზოგჯერ მჭირდება ხუთი წუთი, რომ ამოვისუნთქო და ვარჯიში გავაგრძელო. სამეჯლისო ცეკვები ჩემთვის ახალი ტერიტორია იყო. ყველა ცეკვას თავისი სირთულე ახლავს, მაგრამ მათი დაძლევა საინტერესოა.
ირინკას რამე არ გამოსდის?
ოთო:
ვინ აძლევს იმის საშუალებას, რომ რამე არ გამოუვიდეს?!. იმდენს ვაწამებ და ვაწვალებ… მაქსიმალისტი ვარ. ჩემს ცხოვრებაში სიტყვა „ვერ“ არ არსებობს. შესაბამისად, როცა ვინმე ამბობს, რომ რაღაც ვერ გამოსდის, ჩემთვის მიუღებელია. ირინკას იქამდე ვავარჯიშებ, სანამ არ გამოუვა ხოლმე. გვივარჯიშია ბევრი საათი ამის გამო. გარდა ქორეოგრაფიისა, ვამუშავებთ თითოეულ დეტალს, წვრილმანს, გახედვა-გამოხედვასაც, დიდ ყურადღღებას ვაქცევთ. ვამეცადინებ ისე, როგორც ჩემს პროფესიონალ მოსწავლეებს. ვითხოვ და შესაბამისად, ვარ შედეგზე ორიენტირებული. ვფიქრობ, რომ ყველაფერი გამოსდის, სხვა საშუალებას არ ვაძლევ.