ნუცა ბუზალაძემ ალბანურ კონკურსში საერთაშორისო კატეგორიაში გამარჯვება მოიპოვა. მომღერალი მზადაა, საქართველო ყველაზე დიდ მუსიკალურ ფორუმზე, „ევროვიზიაზე“ წარადგინოს და აღნიშნავს, რომ საკმაოდ დიდი გამოცდილება დაუგროვდა ამ კუთხით…
ნუცა ბუზალაძე:
ეს ფესტივალი ალბანეთში მრავალი წელია, არსებობს, მაგრამ ბოლო ორი წელიწადია, საერთაშორისო გახდა და სხვა ქვეყნების კონკურსანტებსაც შეუძლიათ მონაწილეობა. არის ორი კატეგორია, ერთში მხოლოდ ალბანელი იმარჯვებს, მეორეში კი – სხვა ქვეყნის კონკურსანტი. სულ ორი კატეგორია აქვთ გამოყოფილი გამარჯვებულებისთვის. საერთაშორისო კატეგორიაში მონაწილეობდნენ კონკურსანტები იტალიიდან, ესპანეთიდან, საბერძნეთიდან, ბელგიიდან, ხორვატიიდან და ა.შ. კონკურსი არ ტარდება მხოლოდ ევროპული ქვეყნებისთვის. ნებისმიერი ქვეყნის წარმომადგენელს შეუძლია მონაწილეობა. ორივე კატეგორიის გამარჯვებულისთვის ერთი და იგივე პრიზია, პირველი ადგილი.
მთელი ცხოვრება კონკურსებში მონაწილეობ…
გამიხარდა, რომ ალბანური ფესტივალის ფარგლებში, მომღერლებს საკუთარი სიმღერების წარდგენა შეეძლოთ. მიშო სულუხიამ ეს სიმღერა ხუთი წლის წინ დამიწერა. ვერც ერთ სიტუაციას ვერ მოვარგე, უფრო სწორად, ვინახავდი, არ მინდოდა, რომ ასე ვთქვათ, „გამეფუჭებინა“. ველოდებოდი სწორ მომენტს მის გამოსაყენებლად და ეს დროც დადგა.
მახსოვს, მაიკო კაჭკაჭიშვილის სიმღერა, რომლითაც „ახალი ტალღა“ მოიგე, 13 წლის ასაკში დაგიწერა…
ეს სიმღერაც შენახული მქონდა და ვფიქრობ, ძალიან ამართლებს ეს მიდგომა. ზოგადად, ჩემს ცხოვრებაში რაც ხდება, გამართლებასთან ერთად, დიდი შრომის შედეგია. ცუდს ყოველთვის კარგი მოჰყვება.