გიორგი პავლიაშვილის, იმავე მასტერისა და ნათია დუმბაძის ერთობლივი სიმღერა „არ უყურო დროს“ ახლახან გამოვიდა და მისი პრემიერა „ფორტუნა პლუსზე“ შედგა, 4 ივლისს კი, „ელ ცენტროში“, დუეტმა მედია და კოლეგები კლიპის პრეზენტაციაზე მიიწვია.
საღამოს წამყვანმა თიკა ფაცაციამ სიმღერისა და კლიპის შექმნის მოკლე ამბავი გაგვაცნო და შეკრებილებს სოციალურ ქსელში აქტიურობისკენ მოგვიწოდა. „გვინდა, ყველამ გაიგოს, რომ ასეთ კარგ სიმღერაზე კლიპის პრემიერა შედგა“, აღნიშნა მან და სცენაზე მასტერი და ნათია მიიხმო, რომელთაც კლიპი წარადგინეს.
ვიდეორგოლი საზაფხულო ჰიტზე ასეთივე ჰიტური გამოვიდა. კლიპის რეჟისორი თავად მასტერია, მასვე ეკუთვნის სიმღერის მელოდიაც და ტექსტიც. სიმღერის პირველივე ნოტებიდან მას მთელი შეკრებილი საზოგადოება აჰყვა. ტექსტიც და მელოდიაც იმდენად დასამახსოვრებელია, რომ კლიპის მეორედ ჩართვის შემდეგ მას უკვე ყველა მღეროდა.
ვიდეორგოლის პრემიერის შემდეგ ცოცხალი შესრულების დრო დადგა. სცენაზე ჯერ სალომე ბაკურაძე ავიდა ბენდ „გრუვერსის“ თანხლებით, შემდეგ თავად საღამოს ერთ-ერთ გმირი ნათია დუმბაძე, ხოლო სანამ მუსიკალურ ესტაფეტას მასატერს გადასცემდა, რომელიც საკუთარ ბენდთან ერთად ემზადებოდა სცენაზე ასასვლელად, მათ ერთობლივად შეასრულეს ახალი სიმღერა.