მსახიობ ნანკა კალატოზიშვილს კაფე „ორანჟერეაში“ შევხვდით, სადაც მასთან ინტერვიუ ჩავწერეთ და ახალი ფოტოსესიაც გადავიღეთ. მსახიობი არაჩვეულებრივ ფორმაშია, თუმცა სცენაზე, თავისი სხვა კოლეგების მსგავსად, ვერ გამოდის გასაგები და ობიექტური მიზეზების გამო – კორონავირუსმა ხელოვანებს აუდიტორიასთან ურთიერთობის სიამოვნება მოაკლო. არავინ იცის, როდის შეძლებენ ისეც სცენის მტვერის ჩაყლაპვას, რომელიც ძალიან მოენატრათ.
ნანკამ ეს პერიოდი, კარანტინის წესების სრული დაცვით, შვილის გარემოცვაში, მასზე ზრუნვით გაატარა.
ნანკა კალატოზიშვილი:
ამ სტრესისგან ბოლომდე არ ვარ გათავისუფლებული. არც ნათესავებს, არც მეგობრებს ვნახულობდი. სახლში შესული ყველაფერს ვსპირტავდი, ტანსაცმელს აუცილებლად ვიხდიდი და აბაზანაში შევდიოდი. ორი კვირის წინ ჩემი ძმა მესტუმრა და გამოსაცვლელი ტანსაცმელი წამოვაღებინე. ახლა ჩემთან სტუმრობისას მხოლოდ ფეხზე იხდიან.
ძალიან აქტიურად არც ახლა გავდივარ გარეთ. ერთხელ გავედი „მზიურში“, სადაც ბევრი ხალხი დამხვდა. მას მერე იპოდრომი ავარჩიე, სადაც დისტანციის დაცვა შესაძლებელია. ნელ–ნელა მოვინახულე მეგობრები. ბოლომდე ვერ მოვდუნდი. ის ფსიქოზი, და ამ სიტყვას თამამად ვამბობ, არ მჭირდა არც ღორის გრიპზე და არც სხვა ვირუსის დროს.
სანამ კარანტინი გამოცხადდებოდა, რეპეტიციები გვქონდა თეატრში, პრემიერა უნდა გვქონოდა, ტვინით გადართული ვიყავი… მერე, როცა ბრძანება მოვიდა, რომ აღარ შეიძლებოდა არაფერი, ტელევიზორთან დავჯექი და იქ დაიწყო ჰორორი. როცა ვუყურებდი, ხალხი როგორ არ უფრთხილდებოდა ერთმანეთს, მგონი, ამის გამო დამეწყო შფოთვა.
ახლა ხელთათმანებს აღარ ვიცვამ, თუმცა აფთიაქსა თუ სუპერმარკეტში აუცილებლად მიკეთია. პირბადე გარეთაც მეკეთა და გული მიმდიოდა, ახლა, თუკი ახლოს ხალხი არაა, ვიხსნი.