მერაბ სეფაშვილი ახალი ალბომის გამოსაცემად ემზადება. ის თემურ ნიკოლაიშვილის სტუდიაში უკვე მუშაობს და რამდენიმე კომპოზიციაც ჩაწერა, მათ შორისაა ძველი სიმღერები, რომლებსაც მომღერალი ახლებური არანჟირებითა და ვერსიით შემოგვთავაზებს. ალბომი მალე გამოვა და მას, რასაკვირველია, მომღერლის სოლოკონცერტიც მოჰყვება.
მერაბ სეფაშვილი:
ვამზადებთ ახალ ალბომს. თემურ ნიკოლაიშვილის სტუდიაში ვმუშაობ, გია მაჭარაშვილთან ერთად. სხვათა შორის, იქნება ახალი სიმღერებიც და ძველი ახალიც, ბევრ სიურპიზს გპირდებით. ეს ძველი სიმღერები არ არის ჩემი რეპერტუარიდან და ახლებურად შემოგთავაზებთ. ჩემეული ხედვაა ეს, მე როგორც ვხედავ, ისე იქნება.
ბევრი ალბომი არ მაქვს გამოცემული. უამრავი სიმღერა მაქვს ჩაწერილი, მაგრამ ალბომად არა. ბევრი მათგანი არავინ იცის და მეც არ ვუსმენ. ახალ სიმღერებზე მაქვს საუბარი. როცა რაღაცას ხატავ და გადაშლი, ეს ამბავია. მეორე დღეს რომ აღარ მოგწონს და თავიდან იწყებ ყველაფერს.
თავად წყვეტთ ერთპიროვნულად, რა გამოიტანთ საჯაროდ თუ ვინმეს აზრსაც ითვალისწინებთ?
ყველას აზრს ვითვალისწინებ, მეგობრების, მუსიკოსების. ძალიან მიყვარს ბავშვების რეაქციის ნახვაც, სულ მთლად პატარების, ბავშვის ყური სხვა არის. ბოლო წერტილს მე ვსვამ. ახალ ალბომში ჯერჯერობით ყველაფერი მომწონს. ათამდე სიმღერა იქნება, რამე თუ არ ამოვიღე.
გია გოგორიშვილი:
ალბომი საახალწლოდ გამოვა. მასში ქართული მარგალიტები შევა, თუმცა იქნება ახალი სიმღერებიც, ასე ვთქვათ, ბონუსს რასაც ეძახიან. ერთ-ერთი სიმღერა ეკუთვნით ლილიკო ნემსაძეს და ირინა სანიკიძეს.