მარიკო ლეჟავას „მელოგრანოში“ შევხვდით. მომღერალს სიახლეები აქვს. ახალხან მისი ბენდი დაიშალა, უფრო სწორად, „ნონსტოპთან“ თანამშრომლობა საკუთარი სურვილით გაწყვიტა, რადგან მათი საქციელი არ მოეწონა, როცა სხვა სოლისტთან მასთან შეუთანხმებლად გადაწყვიტეს თანამშრომლობა.
მარიკო, სიმღერას აქტიურად უბრუნდება, გარკვეული პერიოდის წინ ჯანმრთელობის პრობლემის გამო ამ სფეროში მუშაობას ვერ ახერხებდა, თუმცა ახლა ახალი ბენდთან მუშაობაზე მოლაპარაკაბებს აწარმოებს და რაც მთავარია, ახალი საქმეც გაიჩინა, საკუთარი ბრენდი ჩამოაყალიბა და შექმნილ ჩანთებს ინტერნეტის საშუალებით ყიდის.
რამ გამოიწვია შენი ბენდის დაშლა?
მარიკო ლეჟავა:
ჩემი ბენდთან თანამშრომლობის პერიოდი ნახევარ წელიწადს გაგრძელდა. მქონდა ჯანმრთელობის პრობლემა, აღმომაჩნდა კისტა ხმის იოგზე, რაც ძალიან საშიში იყო – 50/50-ზე იყო, გავაგრძელებდი თუ არა სიმღერას. ოპერაცია, საბედნიეროდ არ დამჭირდა, რადგან თვითონ გამიქრა, ექიმების გასაოცრად. ძალიან დიდი ხანი აღარ ვმღეროდი, შესაბამისად, ყელს დატვირთვაც აღარ ჰქონდა, მაგრამ კისტა თუ გაქრებოდა, ექიმებს არ ეგონათ. ძალიან გამიმართლა. სწორედ ამის შემდეგ დავიწყე თანამშრომლობა ბენდთან „ნონსტოპი“, ერთად შევიკრიბეთ. ძალიან სასიამოვნო პერიოდი გავატარეთ ერთად, მაგრამ ბოლოს მოხდა ისეთი უსიამოვნო ფაქტი, რამაც მაფიქრებინა, რომ მათთან კომფორტულად ვეღარ ვიქნებოდი და მერჩივნა, ურთიერთობა შემეწყვიტა.
უფრო ვრცლად შეგიძლია მოგვიყვე?
ბევრს მოვუყევი, რადგან ისე აღვშფოთდი და იმდენად არ ველოდებოდი მათგან, რომ ძალიან გაოცებული დავრჩი. ახალი წლის პერიოდში გვქონდა დაგეგმილი ივენთები, კონცერტები. მცირე პაუზა გამოგვიჩნდა, რამდენიმედღიანი. ჩემმა მეგობარმა, სხვა ბენდის წევრმა, გამომიგზავნა ფოტო, სადაც ჩემი ბენდის წევრები სხვა, ძალიან ცნობილ მომღერალთან ერთად გამოდიოდნენ. ეს, რა თქმა უნდა, არანაირი პრობლემა არ იქნებოდა, მე რომ მცოდნოდა და გავეფრთხილებინე. ჩემი ბენდის ოთხივე წევრი, ყველა მათგანი იქ იყო. ერთი ან ორი რომ ყოფილიყო, ეჭვი არ შემეპარებოდა, მაგრამ ოთხივე იქ აღმოჩნდა, თან, მანამდე ფოტოსესიაშიც მიუღიათ მონაწილეობა. ერთ-ერთ მათგანს დავურეკე და ვკითხე, რა ხდებოდა, მიპასუხა, რატომ უნდა გვეთქვა, ეს ხომ არ იყო მრავალჯერადი პროექტიო. ეს შეურაცხმყოფელი მიდგომაა, მე არ შემიძლია, ასე არაფრად ჩავაგდო ადამიანი, რომელიც ჩემი გუნდის წევრია და ჩემი ახლობელია. ყოველ შემთხვევაში, მე ასე მივიჩნევდი, რომ მათი ახლობელი ვიყავი, რადგან ძალიან კარგი ურთიერთობა გვქონდა. ურთიერთობა ახლაც კარგი გვაქვს, მე მათ არ ვმტრობ, მაგრამ მათი პროფესიონალიზმის დონემ, ჩემი გადმოსახედიდან, ძალიან დაიწია. გადავწყვიტე, დავრჩენილიყავით მეგობრებთან, თუმცა შეგვეწყვიტა მუსიკალური და სამსახურებრივი ურთიერთობა.