მაია ასათიანი ჩვენს ფოტოობიექტივში მისი საჯარო სახისთვის უჩვეულოდ ჩაცმული მოხვდა – რასაკვირველია, ჩვენი შეთავაზებითა და საკუთარი სურვილით, ძალიან მოკლე შორტებსა და თამამ მაისურში. ფოტოგადაღება და ინტერვიუ მის ფერად სახლში შედგა, სადაც ახლა ცხოვრობს. რადიკალურად განსხვავებული და ახალი ცხოვრება, რომელიც ცნობილი ტრაგედიის შემდეგ დაიწყო, საკუთარი თავის ძიებას, მის პოვნასა და ჰარმონიულ არსებობას უკავშირდება. ათი წლის წინ „ფორტუნას“ ასეთ წინადადებას არ დათანხმდებოდა, მაგრამ ახლა მაია ასათიანი მხოლოდ იმას აკეთებს, რაც თავად სურს და მხოლოდ იმ ადამიანებს ეკონტაქტება, რომლებიც ბედნიერებას ანიჭებენ, მათ შორის კი არის ერთი განსაკუთრებული მამაკაციც…
მაია, როგორ შეეგუე ახალ ტელევიზიას და როდიდან გექნება სტუდია?
მაია ასათიანი:
ახალ ტელევიზიაში გადასვლა ძალიან საინტერესო პროცესი იყო პიროვნულად ჩემთვის. წლების განმავლობაში მაინც ერთგვარ კომფორტის ზონაში ვიყავი და რაღაც მომენტში დგება წამი, როდესაც ძველი უნდა დაასრულო და კარიერაში ახალი ეტაპი დაიწყო. ეს ადრეც გამიკეთებია. ვერ ვიტყვი, რომ ძალიან რთული იყო, მაგრამ ენერგიით ვარ სავსე, ყველაფერი ახალია და მაქვს განცდა, რომ ახლა ვიწყებ ყველაფერს. არ დაველოდეთ არც პავილიონის აშენებას, არც დეკორაციას… „რუსთავი 2“-თან დამშვიდობებიდან ორ კვირაში გავედით ეთერში. ძალიან აზარტული პროცესია. დღეც შევიცვალეთ და ეს იყო რთული, რადგან მაყურებელი „პროფილს“ ხუთშაბათს იყო მიჩვეული. განცდა მაქვს, თითქოს ოცი წლის ვარ და თავიდან ვიწყებ კარიერას. თუ მუდმივად ისწრაფვი სიახლეებისკენ, განახლებებისკენ, ემშვიდობები წარსულს, არასდროს დაბერდები. სიკვდილის წინაც, ასი წლისაც, შინაგანად ახალგაზრდა იქნები.
ძალიან ბევრი გეგმა მაქვს. მთავარი ჩემთვის ისაა, რომ ქართულ ტელევიზიებში ბევრი გასართობი თოქშოუა, რომელიც „პროფილს“ ძალიან ჰგავს. ეს პრობლემა სულ იდგა და კარგი მესიჯია, რადგან ჩვენ სწორი გზით მივდიოდით. ახლა მინდა ახალი ველოსიპედის გამოგონება, რომ „პროფილი“ არც თავის თავს ჰგავდეს და არც იმ გადაცემებს, რომლებიც ასე დაემსგავსა „პროფილს“. შარშან გადავწყვიტეთ, მთელი სეზონი ტეტ-ა-ტეტ ინტერვიუებზე აგვეგო, ახლა ამ ტიპის ინტერვიუები ბევრ არხზეა, ამიტომ ჩვენ კიდევ შევიცვლებით.