ლელა წურწუმია და კახი მამულაშვილი ერთ–ერთი პირველები არიან, ვინც მკაცრი რეგულაციების ფონზე შოუბიზნესის სრული გაჩერების პერსპექტივაზე ალაპარაკდნენ. როგორც fortuna.ge–სთან ინტერვიუში აღნიშნავენ, ხელოვანები თავს ამ სიტუაციაში კარგად თავს ვერ იგრძნობენ და უფრო რთული ვითარება შეიქმნება, თუკი ხელისუფლებამ რეგულაციები არ შეარბილა და მათ მუშაობის საშუალება არ მისცა.
პირველ რიგში, მინდა გკითხოთ, როგორ ხართ?
ლელა:
გადასარევად (იცინის). პროფესიული კუთხით თუ მისვამ ამ კითხვას, ძალიან ცუდად და ეს უნდა ითქვას. ძალიან დიდი სირთულის წინაშე აღმოჩნდნენ ჩვენი პროფესიის ადამიანები, განურჩევლად დარგისა. აბსოლუტურად უმოქმედოდ. არტისტისთვის მხოლოდ ის კი არ არის მთავარი, რომ კონცერტზე გამოვიდეს. უნდა მიეცეს რეპეტიციის საშუალებაც, უნდა გამღერდეს, რომ ფორმაში იყოს. არ არსებობს ასეთი რამ, რომ პროფესიონალი მომღერალი, ბოდიშს ვიხდი ამ გამონათქვამისთვის, პირდაპირ ლოგინიდან ადგეს და სცენაზე გამოვიდეს. ის აუცილებლად აკეთებს გამღერებას, ემზადება იმისთვის, რომ სამწუთიანი სიმღერისას თუ სოლოკონცერტისას იყოს მოწოდების სიმაღლეზე. როცა ეს ყველაფერი არ გაქვს, ხარისხსაც ვერ დებ. იქამდეც ვერ მიდიხარ, რომ კონცერტი გააკეთო. ვინც ეს რეგულაციები დააწესა, არავინ გაითვალისწინა ჩვენი პროფესიის ადამიანების პრობლემა. არანაირად არ უფიქრიათ. არც მიკვირს. ვერც იფიქრებდნენ, რადგან ეს არ არის პირდაპირ შემხებლობაში მათ პროფესიასთან. შეიძლება, არ აქვთ ჩვენს პროფესიაზე არანაირი წარმოდგენა.
რამდენიმე წლის წინ, ერთ–ერთ საახალწლო გადაცემაში მოინდომეს პოლიტიკოსებისა და მომღერლების დუეტების ჩაწერა. ვიღაცები ძალიან მსუბუქად უყურებდნენ ამ ყველაფერს. სტუდიაში რომ შევიდნენ და ვუთხარით, რა უნდა ემღერათ, მახსოვს მათი შეშინებული სახეები. მიხვდნენ, როგორი რთული პროცესია. ერთ–ერთმა პოლიტიკოსმა ბოდიშიც კი მოგვიხადა, არ ვიცოდით, რომ ასეთი რთული იყოო. ნებისმიერი პროფესია ძალიან რთულია…