გიორგი ყიფშიძეს მიხეილ თუმანიშვილის სახელობის თეატრში შევხვდით ინტერვიუსთვის. მსახიობთან საუბარი იმ ინფორმაციით დავიწყეთ, რომელიც თავად გაავრცელა „ფეისბუქზე“, გიორგიმ დაწერა, რომ თუმანიშვილის თეატრს ახლა განსაკუთრებული პერიოდი უდგას, რადგან ყველა სპექტაკლზე ბილეთები რამდენიმე წუთში იყიდება. გიორგისთან მის ბოლოდროინდელ რთულ პერიოდზეც ვისაუბრეთ, როცა მკურნალობის პროცესს გადიოდა…
შენი „ფეისბუქის“ გვერდიდან შევიტყვეთ, რომ თურმე ხალხი თეატრში დადის და ბილეთებზე დიდი წეწვა-გლეჯა ყოფილა…
გიორგი:
რაოდენ გასაკვირიც უნდა იყოს, ასეა. შევეგუე უკვე, მთლად ახალი ამბავიც არ არის. დაახლოებით ერთი წელიწადია, თუმანიშვილის თეატრში ბილეთები არ იშოვება. ამ სიტყვის პირდაპირი მნიშვნელობით, ზოგჯერ 11 წუთში იყიდება სპექტაკლების ბილეთები. ახლა „ბაკულაზე“ მინდოდა ორი ადამიანის დაპატიჟება და ფიზიკურად არ იყო ბილეთები, სულ ასეა, რაც ძალიან მაგარია.