„ჩემი ცოლის დაქალების“ პირველივე სერიიდან გვახსოვს ნინას პერსონაჟი, რომელიც უკვე რვა წელია, სტაბილურად ჩანს ეკრანზე და ყველაზე პოპულარული სერიალის ერთ-ერთი ყველაზე პოპულარული გმირია.
ანა ტყებუჩავამ ამ რვა წლის განმავლობაში, სერიალში მონაწილეობის პარალელურად, პირადი ცხოვრების მოწყობაც მოახერხა, გათხოვდა და ორი გოგონა გააჩინა. სერიალის სცენარისტმა და პროდიუსერმა მისი დაფეხმძიმება სცენარში ორივეჯერ გაითვალისწინეს.
დღეს „ჩემი ცოლის დაქალები“ აღარ გადის „რუსთავი 2“-ზე და ახალი სიცოცხლე ახალ ტელეარხზე„ ფორმულა“ დაიწყო. ანა ამბობს, რომ მაყურებლის იმედი აქვთ, რომელმაც „ჩცდ“ ამდენ ხანს აცოცხლა…
ანა ტყებუჩავა:
ასე დაიწყო ყველაფერი რვა წლის წინ. „ჩემი ცოლის დაქალებში“ მივედი გამხდარი, ახალგაზრდა, ვარდისფერლოყებიანი ბავშვი… არც ისეთი ბავშვი ვიყავი, ვხუმრობ. 28 წლის ვიყავი. საკმაოდ დიდი ვიყავი და ზუსტად ვიცოდი, რასაც ვაკეთებდი. კიდევ, „ფორმულა კრეატივმა“ იცოდა კარგად, რას აკეთებდა და ამასაც ძალიან დიდი მნიშვნელობა ჰქონდა. დღემდე ცოცხალი პროცესია, გვემატებიან ადამიანები, მაგრამ ფორმულა იგივე რჩება.
პირველი სერიის გადაღებაზე მიხვდი, რომ რაღაც ძალიან საინტერესოს აკეთებდით?
მქონდა შეგრძნება, რომ ძალიან მნიშვნელოვან რაღაცას ვიღებდით, მაგრამ არ მქონდა მოლოდინი ასეთი პოპულარობის. მაშინ ვთქვი, რომ რასაც ვაკეთებ, ბოლომდე კარგად უნდა გავაკეთო-მეთქი. ძალიან მსიამოვნებდა ამ სერიალში მონაწილეობა. ყველაფერი მახსოვს, კოსტიუმიდან დაწყებული, ლოკაციით დამთავრებული.