მომღერალი ქეთი ფარესაშვილი დიდი ხანია საზოგადოების წინაშე აღარ გამოჩენილა. ის მხოლოდ კორპორატიულ წვეულებებზე და საქველმოქმედო ღონისძიებებზე მღერის. ქეთი განსაკუთრებით, აქტიურად ეხმარება „ევროპა დონას“ ქართულ წარმომადგენლობას, რომელიც ძუძუს კიბოთი დაავადებული ქალების დასახმარებლად არის შექმნილი. მომღერალმა სულ ცოტა ხნის წინ, წიგნზე დაიწყო მუშაობა. როგორც თავად აცხადებს, წიგნის სახელწოდება იქნება „ნაყინის გემო“. „წიგნი იმაზეა, თუ როგორ უნდა მოერიო ცხოვრებაში რაღაც სირთულეებს, როგორ დაძლიო. ერთი-ორი ეპიზოდი ჩემი ცხოვრებიდანაც ჩავაქსოვე და ცოტა იუმორში აღვწერე“ – აცხადებს ფარესაშვილი.