ტელეწამყვანმა ანა კოშაძემ თავის ულამაზეს, მინიმალისტური დიზაინით გაფორმებულ სახლში გვიმასპინძლა, რომელიც თბილისის ერთ-ერთ ცენტრალურ უბანში მდებარეობს. ანა იქ ოჯახთან ერთად სულ ორი თვეა, რაც გადავიდა და ახალაშენებულ კორპუსში პირველი მოსახლეა. სახლიც საკუთარი და თავისი ქალიშვილების გემოვნებით მოაწყო, გოგონებისთვის საძინებლების მოწყობისას სრულად გაითვალისწინა მათი სურვილები. მთავარი, რაც ანას ძალიან უნდოდა, ეს თეთრი კედლები იყო, რომლებსაც საყვარელი ქართველი მხატვრების ნამუშევრებით გაამრავალფეროვნებს. ნახატები ჯერჯერობით არ დაუკიდია, არც ტელევიზორი.
მცირე ზომის მისაღები, რომლის ფართიც მესამე საძინებლის მოწყობის სურვილმა „დააზარალა“, ასევე გაფორმებულია მცენარეებით, რომლებსაც დიდი სიამოვნებით უვლის ტელეწამყვანის საყვარელი მამიდა. მისაღებში განთავსდა თეთრი ზომის რბილი ტახტი, რომელიც ანამ ქართულ კომპანიას შეუკვეთა, ისევე, როგორც – საწოლი, საკუთარი საძინებლისთვის. ჰქონდა არჩევანი, ან ჭურჭლის სარეცხი მანქანა უნდა ეყიდა, ან საწოლი, არჩევანი, როგორც ღიმილით გვითხრა, სარეცხ მანქანაზე გააკეთა, საწოლი კი შემდეგ შეუკვეთა, ამიტომაც ჯერჯერობით მის ოთახში მხოლოდ მატრასია.