საფრანგეთიდან დაბრუნების შემდეგ, მსახიობი და რეპერი, კაბუ თავის კარიერას ნაწილობრივ დაუბრუნდა. ზაფხულში რამდენიმე წარმატებული კონცერტის შემდეგ გააცნობიერა, რომ მისი სიმღერები ჯერ კიდევ ახსოვთ და მისი მოსმენა სურთ. შესაბამისად, ახალ პროდიუსერთან ერთად მალე ალბომის ჩაწერას დაიწყებს. როგორც გვითხრა, შესაძლოა, ალბომი მზად გაზაფხულზე იყოს, რადგან მანამდე საკუთარ თავს, ვიზუალის მოწესრიგებას უნდა მიხედოს და გარკვეული ეტაპები გაიაროს იმისთვის, რომ მსმენელის წინაშე წარდგეს.
კაბუ, ვიცი, რომ სიახლეები გაქვს…
ნელ-ნელა ვიწყებთ მუშაობას. პატრონიც გამომიჩნდა, პროდიუსერი, მიკა გახდა ჩემი პროდიუსერი, ჩვენი ცნობილი მიკა, ბავშვობის მეგობარია ჩემი და ამ სფეროში ყველაფერი იცის. რასაც ჩვენ ვაკეთებთ, „შავ მუსიკას“, ექსპერტია. არტისტის მოვლაც იცის, მიხედვაც და მის გემოვნებასაც ვენდობი. უნდა ვცადოთ და შევხედოთ, რა იქნება. მე ვფიქრობ, რომ ყველაფერი გამოვა.
პანდემია თუ დაგვაცდის, გვინდა კონცერტების გაკეთება განახლებული რაღაც-რაღაცებით. ახალი 4-5 ტრეკის ჩაწერას ვაპირებთ. ბენდშიც ვიცით, ვინ იქნებიან. ჩემი ბავშვობის ოცნებაა ბენდთან ერთად მუშაობა, სანამ აქ ბენდომანია დაიწყებოდა. ალბათ, ყველამ იცის, რომ ეგრევე ჰიპ-ჰოპით არ მოვსულვარ, ცოცხალით დავიწყე და ისედაც მინდოდა, ვიღაცებისთვის არ მიმიბაძავს. ლამაზია, საინტერესოა და კარგია ბენდთან ერთად მუშაობა.
ამასთანავე ალბომიც მინდა ახალი. მერე, ალბათ, გავჩერდები, მაგრამ ჯერ გაჩერებაზე საუბარი არ არის.