ნუცა ბუზალაძემ რუსულ მუსიკალურ შოუში, სადაც მას ჟიურის წევრთა ასეულის გული უნდა მოეგო, ნამდვილი ფურორი მოახდინა. მართალია, მან მეორე ადგილი დაიკავა, თუმცა უამრავი თაყვანისმცემელი შეიძინა, მათ შორის ცნობილი რუსი შემსრულებელი, სერგეი ლაზარევიცაა, რომელმაც მას „სონის“ რუსულ წარმომადგენლობასთან კონტრაქტი გააფორმებინა. ნუცას პირვეოლი რუსულენოვანი სინგლი უკვე გამოსულია. მომღერალმა ჯერჯერობით არ იცის, როგორ და სად გააგრძელებს კარიერას. რადიო „ფორტუნას“ ოფიციალურ საიტს მან საკუთარი შთაბეჭდილებები გაუზიარა.
კონკურსში მონაწილეობა როგორ გადაწყვიტე?
ნუცა ბუზალაძე:
პირველ სეზონზე ვაპირებდი გასვლას, მართალი რომ გითხრათ. აღმოჩნდა, რომ ერთ–ერთი გოგონა, ვინც ამ პროექტზე მუშაობს, ქართველია, ლორენა მატუა. მას იურმალადან ვახსოვდი და მომწერა. პირველი სეზონის დაწყებამდე მომწერა, უნდოდა მონაწილეობა მიმეღო. წინა წელს ალბომი გამოვეცი, კლიპი გადავიღე და არ მქონდა დრო, ამიტომაც ვერ მოვახერხე წასვლა. მეორე სეზონზეც შემომეხმიანა. ის რომ არ ყოფილიყო, ამ პროექტში მონაწილეობას ალბათ ვერ გადავწყვეტდი და კიდევ ერთხელ მინდა, მას დიდი მადლობა გადავუხადო. პროექტის ფორმატმაც ძალიან დამაინტერესა, ახალია და ჩემთვის გამოწვევასავით იყო, ძალიან მომეწონა.
პირველი გამოსვლა რომ მახსენდება, ძალიან გავწვალდი გზაში. პირდაპირი ფრენები არ იყო, წინა დღეს ჩავედი და მოსკოვში ჩასვლის პირველი დღე სულ მეძინა. როგორც კი სცენაზე დავდექი, ყველაფერმა გამიარა. ზოგადად, ჩემი საქმის კეთებაში ხელს ვერაფერი მიშლის. სცენაზე დადგომისას ვაკეთებ იმას, რაც საჭიროა (იღიმის).