თაკო ჩხეიძეს დემნა გვასალიასთან მეგობრული და საქმიანი ურთიერთობა აკავშირებს და მის ყველა ჩვენებაზე მიწვევას იღებს. გარდა ამისა, თაკოს „ჯეომოდელსის“ მოდელები უკვე მესამე სეზონია, მონაწილეობენ „ვეტმანის“ ჩვენებებში. ახლახან ის „ვეტმანის“ მორიგი კოლექციის წარდგენას პარიზში დაესწრო და „არტ ფმ“-ში, თათა სადრაძეს გაუზიარა მიღებული შთაბეჭდილებები.
თაკო ჩხეიძე:
რამდენიმე დღეა, დავბრუნდი პარიზიდან. დემნამ კვლავ გაგვაოცა თავისი კრეატიულობით და სავსე ვარ შთაბეჭდილებებით. მართალია, „ჯეომოდელსის“ მოდელები უკვე „ვეტმანის“ მესამე ჩვენებაში მონაწილეობენ. წელს ჩვენმა ოთხმა მოდელმა გაიარა პოდიუმზე, მათ შორის არის ახალი სახე ნინი ელიზბარაშვილი. ყველას ძალიან უხარია დემნასთან მუშაობა, რადგან ის არის საოცრად თბილი, თავმდაბალი და უშუალო.
ყველა შევთანხმდით და ვაღიარებთ, რომ დემნა ჩვენი ქვეყნის საუკეთესო ელჩია. სახელი გაგვითქვა და ამაში დემნას ძალიან დიდი წვლილი აქვს შეტანილი. ყველამ იცის საქართველოს შესახებ, განსაკუთრებით, მოდის სფეროში.
ის კვლავ იყენებს ბავშვობის ნოსტალგიურ თემებს საქართველოდან.
რომელიმე კოლექციაში საქართველოში ბოლო დროს განვითარებული მოვლენები ხომ არ იქცევა ინსპირაციად? თანაც, 20 ივნისს დაემთხვა მისი ჩვენება…
დიახ, ჩვენება 20 ივნისს იყო. ზუსტად ერთი წლის წინ მან მთელი კოლექცია საქართველოს მიუძღვნა. ის ყოველთვის აღნიშნავს, რომ არის სოხუმელი და გაიზარდა დევნილობაში. მაშინ ზუსტად ათ წუთში მთელმა მსოფლიომ გაიგო, რომ საქართველოს ნაწილი არის ოკუპირებული და გაიგო ისიც, რა აქვს გადატანილი დემნას. ჩვენი ქვეყნის უმძიმესი ისტორია თავის კოლექციაში გადმოსცა. ესწრებოდა დიდი რაოდენობით პრესა, გავლენიანი ხალხი და უამრავ გამოცემაში დაიწერა ამ თემაზე.