„რუსთავი 2“-ის ეთერში ახალი მუსიკალური შოუ დაიწყო, სადაც „მხოლოდ ქართულს“ გიმღერებენ. გადაცემის კასტინგების პროცესის პირველი ნაწილი ეთერში გუშინ, 2 აპრილს გავიდა. ვიხილეთ ქართული სიმღერის კარგი, საშუალო და არცთუ კარგი შემსრულებლები. ჟიურის წევრების, მარინა ბერიძის, სოფო ნიჟარაძისა და გიორგი უშიკიშვილის კომენტარებზეც ვიხალისეთ, როცა ისეთ სიმღერებს ვისმენდით, აქამდე რომ არ მოგვისმენია.
Fortuna.ge „ასა ჰოლში“ პროექტის პირველ ჩვენებას ჟიურის წევრებთან და წამყვანებთან, ასევე „მხოლოდ ქართულის“ გულშემატკივრებთან ერთად დაესწრო და მათი ჩაწერის საშუალებაც მოგვეცა.
სოფო ნიჟარაძე, ჟიურის წევრი:
აღელვებული ვარ იმით, რომ ასეთი პროექტი დაიწყო. ახლა ამ ყველაფერს მხოლოდ ჟიურის წევრის გადმოსახედიდან არ ვუყურებ. ვარ მაყურებელი და არ მაქვს შეგრძნება, რომ ამ ყველაფერს ჟიურის წევრის სკამზე განვიცდიდი. ვცდილობ, მივიღო სიამოვნება. ეს არის უპრეცედენტო პროექტი. არსად ყოფილა აქამდე ქართული სიმღერის ასეთი პოპულარიზაცია ასეთი გრანდიოზული პროექტით. მიხარია, რომ „მხოლოდ ქართული“ შედგა და იქნება წარმატებული. აქ მხოლოდ ქართული, ხარისხიანი მუსიკა აჟღერდება. ის, რაც ძალიან მოენატრა ქართველ მსმენელს, ჩვენ გავაკეთეთ. დარწმუნებული ვარ, ყველაზე ღირსეული გაიმარჯვებს.
გყავს ფავორიტი?
რამდენიმე, მაგრამ მოვლენებს წინ არ გავუსწრებ. ბევრი ეპიზოდი გველის, სანახაობრივი, სახალისო, გასართობი, მოსასმენად საინტერესო, ისეთი, როგორიც მალამოდ მოგვედება ყურებსა და გულზე. გაგიმხელთ პროექტის დეტალებს მისი მიმდინარეობისას, ფავორიტებს კი არა (იღიმის).
ნიკა ლომიძე, „მხოლოდ ქართულის“ რეჟისორი:
ყველა სიტყვა და კადრი ზეპირად ვიცი (იღიმის). პირველი კასტინგი არის ეფექტური დასაწყისი. მგონი, მაყურებელი მიხვდა პროექტის არსს. იმედი მაქვს, დაელოდებიან შემდეგ ორშაბათს. ყველა ახალ ორშაბათს უფრო გაგიმძაფრებთ ამ მოლოდინს.
ძალიან მიყვარს ქართული სიმღერა და მაკლია… კასტინგზე მოსულმა კარგად მომღერალი კონკურსანტების რაოდენობამ დაამტკიცა, რომ გვიყვარს და მოგვენატრა ქართული სიმღერები. პროექტიც სწორედ ამის წარმოჩენას ემსახურება.
დიდი იმედი მაქვს და პრინციპში, დარწმუნებულიც ვარ, რომ ახალ ვარსკვლავს აღმოვაჩენთ (იღიმის).
ილო ბეროშვილი, პროექტის წამყვანი:
ბევრ რაღაცას ვსწავლობ, მიუხედავად იმისა, რომ უკვე ექვსი წელია, ტელევიზიაში ვარ. დიდი მადლობა „რუსთავი 2“-ს, რომ კიდევ უფრო დიდი გამოცდილების მიღების საშუალება მომეცა.
კასტინგებზე იმდენად კარგი დრო გავატარეთ, რომ ძალიან სასიამოვნოდ მახსენდება. მადლობა „მხოლოდ ქართულს“, რომ ამდენი ნიჭიერი ადამიანი აღმოაჩინა.