ნოდიკო ტატიშვილის პარიზში გადაღებული ახალი კლიპის პრემიერა და მისი რიგით მეორე ალბომის პრეზენტაცია 19 მარტს, კინო „ამირანის“ დიდ დარბაზში გაიმართა. ვიდეო ნესტან სინჯიკაშვილმა გადაიღო სიმღერაზე, რომლის მელოდიაც რუსა მორჩილაძეს, ხოლო ტექსტი – ირინა სანიკიძეს ეკუთვნის. პარიზში გადაღებებში გოგოლა კალანდაძის შვილი, ელენეც მონაწილეობდა. ნოდიკოს პერსონაჟი დიდი ხნის შემდეგ საფრანგეთის დედაქალაქში ბრუნდება, სადაც ძველი სიყვარული უნდა მოძებნოს. შავ-თეთრი კადრებით გაჯერებული ვიდეო ძალიან სადა და ლამაზი გამოვიდა.
ვიდეო და ალბომი სტუდია „ბრავოს“ ხელმძღვანელმა, ზაზა შენგელიამ წარადგინა, რის შემდეგაც სცენაზე ნოდიკო იხმო. მან, თავის მხრივ, ალბომისა და კლიპის შექმნაში ყველა მონაწილეს მადლობა გადაუხადა.
ახალი კლიპი კინოთეატრის დარბაზში ორჯერ აჩვენეს, რის შემდეგაც ნოდიკო ტატიშვილმა ახალ ალბომზე დამსწრე საზოგადოებას ხელი მოუწერა. მსურველი უამრავი ადამიანი მაგიდასთან რიგში ელოდებოდა წარწერით დამშვენებულ ახალ ალბომს. სანამ მომღერალი შთაბეჭდილებების გასაზიარებლად მოიცლიდა, ჩვენ მისი კოლეგები ჩავწერეთ და ვიდეოს და ასევე სიმღერის შესახებ აზრი ვკითხეთ.
პირველ რიგში კი დავინტერესდით, რამდენად მოეწონა საკუთარი სიმღერის შესრულება კომპოზიტორ რუსა მორჩილაძეს:
„ძალიან მომეწონა შესრულება, სიმღერას ნოდიკო ძალიან მოეფერა. პატივს ვცემ ისეთ მომღერლებს, რომლებიც ბოლომდე მიჰყვებიან კომპოზიციას, ლამაზად „ჩააცმევენ-დაახურავენ“ სიმღერას, გააპიარებენ, მოუვლიან, სწორ არანჟირებას გაუკეთებენ და სწორად შეასრულებენ. ნოდიკომ ზუსტად ისე იმღერა, როგორც მქონდა ჩაფიქრებული, მეც ასე ვიმღერებდი, შეიძლება, ჩემი ტემპორიტმი და ენერგია სხვანაირი ყოფილიყო, მაგრამ მთლიანობაში შესრულება ჩემთან ძალიან ახლოსაა.
რაც შეეხება კლიპს, ნესტან სინჯიკაშვილი ძალიან მაგარი გოგოა, ძალიან კარგი კლიპი გადაიღო. მარტო მან უნდა გადაიღოს ამის შემდეგ კლიპები, ასე ვთქვი მე (იღიმის).
ლელა წურწუმია:
არაჩვეულებრივი ნამღერია. მუსიკა, ტექსტი, რეჟისურა, დადგმა, ინტერიერი, იმდენად შერწყმულია, რომ დიდი ემოციები დამიტოვა. მაქვს ასეთი თვისება, სიმღერა უნდა მომეწონოს ერთი მოსმენით, რომ ჩემს რეპერტუარში მოხვდეს.