სოფო ნიჟარაძეს სასტუმრო „ქისში“ შევხვდით ინტერვიუსთვის, სადაც ბოლოდროინდელ წარმატებებსა და საახალწლო ტრადიციებზე გვესაუბრა. სოფოსთვის 2017 წელი სასიამოვნო სიახლეებით იყო სავსე, 2018 წლისგან კიდევ უფრო მეტს ელოდება, როგორც მაქსიმალისტი, რომელიც არასდროს კმაყოფილდება არსებულით და მუდამ უფრო მეტი სურს.
სოფო, საუბარი დავიწყოთ „დაფ ბამას“ კონკურსით, სადაც „საუკეთესო ქართული პერფორმანსისთვის“ აიღე ჯილდო.
„Daf Bama Music Awards“ არის ყოველწლიური მუსიკალური დაჯილდოვების ცერემონიალი, რომელიც გერმანიაში იმართება. წელს, როგორც საქართველოს წარმომადგენელი, ამომირჩიეს და დამაჯილდოვეს. მუსიკალური კონკურსი მსოფლიოს ბევრი ქვეყნიდან არჩევს ნომინანტებს, მათ შორის ძირითად აქცენტს აზიის და აღმოსავლეთ ევროპის ქვეყნებზე აკეთებს, აკეთებენ გამოკვლევებს და ნახულობენ იმ არტისტებს, რომლებიც საკუთარ ქვეყანაში აქტუალურები არიან. შემდეგ ჰეშთეგებით ითვლიან სოციალურ ქსელში მხარდაჭერას და თუ გადასცდები ლიმიტს, ნომინანტის გარდა, ხდები მუსიკალური კონკურსის მონაწილეც. თავად კონკურსის ორგანიზატორები ირჩევენ, ვინ დააჯილდოვონ, რადგან ნომინანტობა სხვაა და გამარჯვება – სხვა. დიდი მადლობა ამ მუსიკალურ დაჯილდოვებას, რომ აარჩიეს საქართველო და ჩვენ. ამაში ძალიან დიდი წვლილი მიუზღვის, ჩემს უახლოეს მეგობარსა და უნიჭიერეს პროდიუსერს, სტეფანეს. მისი შრომის დამსახურებაა და ასევე კონტაქტების, რომ ეს კონკურსი ჯერ საქართველოთი დაინტერესდა და შემდეგ – ჩემით. ხალხის უდიდესი მხარდაჭერა მივიღე და მადლობა ყველას, ხალხი რვა თვის განმავლობაში აქტიურობდა, წერდა ჰეშთეგით ჩემს სახელს. ლიმიტი დავაგროვე და გადავედი ხმის მიცემის სისტემაზე… მადლობა ყველას, ვინც ერთხელ მაინც დაწერა ჩემი სახელი, რადგან მე, სტეფანეს და ჩვენს ქვეყანას ბროლის ქანდაკება მოუტანა, რომელიც ახლა ჩემს როიალს ამშვენებს (იღიმის).
შენ თავად დაჯილდოვებაზეც გამოხვედი და მახსოვს, მისი დასრულების შემდეგ სოცქსელში ლაივში ჩაერთე, ღელავდი, რომ სცენაზე ტექნიკური პრობლემა შეგექმნა…
მე გავხსენი დაჯილდოვება, მანამდე იყო წითელი ხალიჩა და პრესკონფერენცია. მე და სტეფანეს ორი დღის განმავლობაში ერთი საათიც არ გვქონია, რომ გავსულიყავით და ულამაზესი ჰამბურგით დავმტკბარიყავით (იღიმის). ჩვენთან ერთად იყვნენ ტოპარტისტები, რომლებიც ცნობილები არიან არა მხოლოდ საკუთარ ქვეყნებში. მე და სტეფანეს ლიმუზინი გვემსახურებოდა. დაჯილდოვების შემდეგ ჩვენმა ლიმუზინმა ცოტა დააგვიანა, თურქეთის და ბალკანეთის წარმომადგენლებთან ერთად მოგივია დაბრუნება. ბალკანეთის წარმომადგენელი გახლდათ ოტილია, რომლის კლიპებს „იუთუბზე“ 500 მილიონი ნახვა აქვს… რომ ჩავსხედით ლიმუზინში, სტეფანე ეკითხება, თქვენც მომღერალი ხართო (იცინის)? მან უპასუხა, დიახ, რა თქმა უნდაო. სტეფანე შეწუხდა და უთხრა, იცით, ჩვენ, სამწუხაროდ, არ გადევნებთ თვალყურსო. მგონი, უარესი უთხრა. ძალიან კარგი გოგონა იყო, იუმორით და მიხვდა, რომ ექსკლუზიურ ადამიანთან ჰქონდა ურთიერთობა, როგორიც სტეფანეა (იცინის).
რაც შეეხება თავად გამოსვლას, მე ძალიან ვინერვიულე. ვფიქრობ, ვერავინ მიხვდა. ჩემი ისნტრუმენტალი არ ჩაირთო და სცენაზე უხერხულობა შეიქმნა. ამის გამო მე და წამყვანი კითხვა-პასუხის რეჟიმში გადავედით, ასე ვთქვათ, წამყვანობაც შევითავსე… ვღელავდი, რადგან ძალიან დიდ არენაზე გამოვდიოდი, დაახლოებით, 50 000-კაციანი კომპლექსი გახლდათ. დიდი პასუხისმგებლობაა, როცა სცენაზე დგახარ და უცბად დაუგეგმავად მიდის ყველაფერი, ვინერვიულე. „ფეისბუქ“-ლაივით რომ ჩავერთე, მომწერეს, ვერავინ ვერაფერს მიხვდაო.
საბოლოოდ, ყველაფერმა ძალიან კარგად ჩაიარა. ორი დაუვიწყარი დღე გავატარეთ ჰამბურგში.სრულად + ფოტოგალერეა