ლიანა ისაკაძის სახელობის საერთაშორისო ფესტივალი „ღამის სერენადები“ 21 აგვისტოდან 20 სექტემბრის ჩათვლით გაიმართება საქართველოს სამ ქალაქში: ბორჯომში, ბათუმსა და თბილისში და ერთი თვის განმავლობაში გააერთიანებს შვიდ კონცერტს, ქართველი მხატვრების გამოფენებს, დარგობრივ მასტერკლასებსა და ვორქშოპებს მოსწავლე ახალგაზრდებისა და შშმ/სსსმ პირებისთვის.
წლევანდელი ფესტივალი, 2023 წლის მსგავსად საზეიმოდ გაიხსნება ქალაქ ბორჯომში, სასტუმრო ბორჯომი ლიკანში. 21 აგვისტოს, ღია ცის ქვეშ გაიმართება დიდი გალა კონცერტი, რომელშიც მიიღებენ მონაწილეობას მსოფლიოში აღიარებული მუსიკოსები: მარიო სტეფანო პიეტროდარკი – ბანდონეონი, იტალია, ელვინ-ხოჯა განიევი – ვიოლინო, აზერბაიჯანი/თურქეთი. ასევე ქართველი შემსრულებლები: მარიამ კიკალეიშვილი – მეცო-სოპრანო, მარიამ და გიორგი ბუგიანიშვილები, ანსამბლი „ბორჯომი“. შესრულდება მსოფლიო კინომუსიკის შედევრები, ბელა ბარტოკის „რუმინული ცეკვები“, ფრაგმენტები ანტონიო ვივალდისა და ასტორ პიაცოლას წელიწადის დროებიდან და ქართული მუსიკა: რევაზ ლაღიძისა და ვაჟა აზარაშვილის სიმღერები.
გახსნითი კონცერტის შემდეგ ფესტივალი გადაინაცვლებს ბათუმში და 23 და 25 აგვისტოს ილია ჭავჭავაძის სახელობის დრამატულ თეატრში ორ კონცერტს წარადგენს.
თბილისის კონცერტები კი გაიმართება 15, 17, 18 და 20 სექტემბერს თბილისის სახელმწიფო კონსერვატორიაში.
წლევანდელი ფესტივალში აგრეთვე მონაწილეობას მიიღებენ საერთაშორისოდ აღიარებული შემსრულებლები და ახალგაზრდა წარმატებული მუსიკოსები:
ბეატრიჩე ვენეცი – დირიჟორი, იტალია; სანდრო ნებიერიძე – ფორტეპიანო, საქართველო; ანდრეს გაბეტა – ვიოლინო, საფრანგეთი; მორის შტიგერი – ბლოკ ფლეიტა, შვეიცარია; გიორგი შავერზაშვილი – ფორტეპიანო, საქართველო; გიორგი ხაინდრავა – ვიოლინო, საქართველო; ლიზი რამიშვილი – ჩელო, საქართველო; მარიამ როინიშვილი – სოპრანო, საქართველო; გიორგი ოიკაშვილი – კლარნეტი, საქართველო; ეროვნული სიმფონიური ორკესტრი და სხვ.
სოლისტებს ტრადიციულად თანხლებას გაუწევს ფესტივალის საბაზო ორკესტრი „საქართველოს ვირტუოზები“ (პირველი ვიოლინო ლელა მჭედლიძე).
საერთაშორისო ფესტივალი „ღამის სერენადები“, რომელიც მსოფლიოში სახელგანთქმულმა მევიოლინემ და დირიჟორმა ლიანა ისაკაძემ 1982 წელს დააარსა საქართველოს უმშვენიერეს მხარეში – აფხაზეთში, ჩვენი ქვეყნის ყველაზე ხანგრძლივი ისტორიის მქონე ტრადიციული ფესტივალია. 1991 წელს განვითარებული მოვლენების გამო ფესტივალმა დროებით არსებობა შეწყვიტა და 2002 წელს, აღდგა „ხელოვნების ზეიმის“ სახელით ქალაქ ბორჯომში, ხოლო 2009 წლიდან დაუბრუნდა შავიზღვისპირეთს, გადაინაცვლა ულამაზეს ქალაქ ბათუმში ისევ „ღამის სერენადების“ სახელით. 2023 წლიდან საფესტივალო ქალაქებს დაემატა ბორჯომი. წელს ფესტივალი აღდგენიდან მეთექვსმეტედ ჩატარდება და მას ლიანა ისაკაძის სახელი მიენიჭა.
ფესტივალის ორგანიზატორია კომპანია არტ ალიანსი, ფესტივალის დირექტორი – ნინა ცაგარელი, 2018 წლიდან ფესტივალის სამხატვრო ხელმძღვანელია გიორგი ისაკაძე – მუსიკოსი და პედაგოგი, ინგოლშტადტში მუსიკისა და ცეკვის აკადემიის და სკოლის დამფუძნებელი და დირექტორი, ლიანა ისაკაძის ძმისშვილი.
ფესტივალის მხარდამჭერები არიან: საქართველოს კულტურის და სპორტის სამინისტრო, აჭარის განათლების, კულტურისა და სპორტის სამინისტრო, ქალაქ თბილისის მერია, ქალაქ ბათუმის მერია, ქალაქ ბორჯომის მერია, იტალიის საელჩო საქართველოში, ბრაზილიის საელჩო საქართველოში, ჩეხეთის საელჩო საქართველოში. მასპინძელი სასტუმრო: ჰილტონ გარდენ ინნ თბილისი.
ფესტივალის პარტნიორი: ეროვნული სიმფონიური ორკესტრი, სასტუმრო ბორჯომი ლიკანი.
ფესტივალის მხარდამჭერი კომპანიები: “ჯიპისი აფთიაქი”,მცენარეული კოსმეტიკის ფუძემდებელი საფრანგეთიდან „ივ როშე“, პრემიუმ კოსმეტიკის ვეგანური, ქართული ბრენდი “პიელ ნატურალსი”. ძმები ხუციშვილების „ღვინის მარანი“, ღვინის კომპანია „GEORGIAN LEGEND”. ფესტივალის საინფორმაციო მხარდამჭერები: აჭარის საზოგადოებრივი მაუწყებელი, საქართველოს პირველი არხი, ტელეკომპანია „რუსთავი2“, ტელეკომპანია „იმედი“, „პოს ტვ“, „ევრონიუს ჯორჯია“, მედიაჰოლდინგი „ჯორჯიან ტაიმსი“, საპატრიარქოს ტელევიზია „ერთსულოვნება“, მედია და ციფრული კომუნიკაციების სააგენტო“კლიპ არტი“, “პალიტრა ჰოლდინგი”, საინფორმაციო სააგენტო „პრაიმ ტაიმი“, ინგლისურენოვანი გაზეთი „Today“, ინგლისურენოვანი ყოველდღიური გაზეთი “Messenger”, ჟურნალი „სარკე“, გაზეთი „აჭარა“, ონლაინ მედია “აჭარა თაიმსი”, რადიო „ფორტუნა“ და ვებ პლატფორმა „ფორტუნა.ჯი“.
ბილეთები შეიძინეთ tkt.ge-ზე.
21 აგვისტო, ბორჯომი, 19:00
სასტუმრო ბორჯომი ლიკანი
მარიო სტეფანო პიეტროდარკი – ბანდონეონი, იტალია
ელვინ ხოჯა განიევი – ვიოლინო, აზერბაიჯანი / თურქეთი
მარიამ კიკალეიშვილი – მეცო-სოპრანო, საქართველო
გიორგი ბუგიანიშვილი – ტენორი, საქართველო
მარიამ ბუგიანიშვილი – ვოკალი, საქართველო
ანსამბლი ბორჯომი (ხელმძღვანელი გიორგი ბუგიანიშვილი)
ფესტივალის საბაზო ორკესტრი საქართველოს ვირტუოზები (პირველი ვიოლინო ლელა მჭედლიძე)
პროგრამა:
ანტონიო ვივალდი – ზაფხული (ციკლიდან „წელიწადის დრონი“)
ბელა ბარტოკი – რუმინული ხალხური ცეკვები
ასტორ პიაცოლა – ზაფხული (ციკლიდან „ბუენოს-აირესის წელიწადის დრონი“)
Vuelvo al Sur
Adios Nonino
ენიო მორიკონე – სამი თემა
კარლოს გარდელი – Volver Por una Cabeza
ფრანც შუბერტი – ფოსტა (ციკლიდან „ზამთრის გზა“)
ვაჟა აზარაშვილი – სენტიმენტალური ტანგო დღეები მიდიან
რევაზ ლაღიძე – თბილისო