ახლახან ინტერნეტში ვირუსულად გავრცელდა ვიდეო, სადაც 21 წლის ულამაზესი გოგონაა გადაღებული ეროვნული მოტივებით შექმნილ სამოსში. მოდელი მარიამ სამხარაძე უამრავ კომპლიმენტს იღებს საკუთარ გარეგნობასთან დაკავშირებით. fortuna.ge გოგონას უფრო ახლოს გაგაცნობთ.
მარიამ, ვირუსულად გავრცელებული ვიდეოს შემდეგ ყველა დაინტერესდა შენით. გაგვაცანი შენი თავი…
მე ვარ მარიამ სამხარაძე, 21 წლის, თბილისიდან. ჯერჯერობით ვსწავლობ სამხატვრო აკადემიაში, ფოტოგრაფიის კურსზე. ვცხოვრობ ჩემს ოჯახთან ერთად – მყავს დედა, მამა და უფროსი ძმა.
ფოტოგრაფია რატომ აირჩიე?
სიმართლე რომ გითხრათ, სხვა სფეროს არჩევა მინდოდა, მაგრამ რადგან სამოდელო საქმიანობა გადავწყვიტე, ვიფიქრე, რომ კარგი იქნებოდა, თუკი ფოტოგრაფიაც მეცოდინებოდა, რომ თუ დამჭირდება, ფოტოების გადაღება შევძლო და თავად მოვიწყო ფოტოსესიები, ვიცოდე შუქის დაყენება და სწორი პოზირება. ყველაფრის ჩემით გაკეთებას ვცდილობ. მინდა, ვისწავლო დეტალები, რაც სამოდელო საქმიანობის წარმართვაში დამეხმარება. მაგალითად, მაკიაჟის გაკეთებაც ვიცი თავად… ასევე ვსწავლობ შილაკის კეთებას, რომ საჭიროების შემთხვევაში, თავად გავიკეთო და ფრჩხილები სულ მოწესრიგებული მქონდეს.
10 წელი დავდიოდი ქართულ ცეკვაზე. მინდოდა, სწავლას გავყოლოდი. ცეკვა იმდენად დიდ შრომას მოითხოვს, რომ ვეღარ გავაგრძელებდი ამის ფონზე სწავლას. ამიტომაც ჩამოვშორდი ჩემთვის საყვარელ საქმიანობას, სიმართლე რომ გითხრათ, ძალიან მენატრება ახლაც, მინდა ისევ ვიარო, მაგრამ დიდი დრო გავიდა უკვე…
