„პირამდე“ – ქართველი ხელოვანის და არტისტის „თამადას“ ის კომპოზიცია და ვიდეოა, რომელმაც საქართველოში ძალიან დიდი პოპულარობა მოუტანა, თუმცა ლაშა ჩხაპელიას მუსიკა, დიდი ხანია, გასცდა საქართველოს საზღვრებს. ის საქართველოში არც შექმნილა და როგორც არტისტი ამბობს, რომლისთვისაც თამადა ერთგვარი ალტერ ეგოა, ვერც შეიქმნებოდა საზოგადოების წნეხის გამო…
ლაშა ჩხაპელიასთან საინტერესო საუბარი შედგა fortuna.ge-სთვის.
ლაშა, ძალიან თავდაჯერებული ხარ, როგორც არტისტი და როდის მოვიდა ეს თავდაჯერება?
აქ რომ მეცხოვრა, თამადა არ იარსებებდა. საზოგადოება და გარემოცვა არასდროს მომცემდა იმის თავისუფლებას, რომ ბაიათები და ელექტრონული მუსიკა გამეერთიანებინა. აქ არც მომინდებოდა ამის დაწყება და ჩემი „ბაბლის“და სოციუმის შიში და ზეგავლენა მექნებოდა, რომ ეს გოიმობაა. 5 წელი ვცხოვრობდი ბერლინში, იქ რომ გავაკეთე ხუმრობით ოთხი-ხუთი ტრეკი, კლუბში ლაივზე დავუკარი და შევურიე თამადები, 900 კაცი მხოლოდ ამაზე ცეკვავდა. საქართველოში არც ვაპირებდი ამ მუსიკის ჩამოტანას, ზოგადად, არ ვგეგმავდი დაბრუნებას. ვიცოდი, რომ იქიდანაც ცნობილი გახდებოდა ჩემი მუსიკა, თუმცა პანდემიის დროს ჩამოვედი ორი კვირით და ორი წლით დავრჩი…