ნინი გოგიჩაიშვილი უკრაინულ არხზე გადაცემას უძღვება, სადაც საინტერესო ადამიანებისა და არაორდინარული პროექტებისა და ბიზნესმოდელების შესახებ უყვება მაყურებელს. ნინი ამჟამად დუბაიშია, სადაც არა მხოლოდ უკრაინული არხისთვის მუშაობს.
ნინი, მოგვიყევი შენი ამჟამინდელი საქმიანობის შესახებ. რატომ ხარ დუბაიში წასული?
ვფიქრობ ახლა ერთ-ერთი ყველაზე საინტერესო პერიოდია ჩემთვის, როცა ვმუშაობ საკუთარი თავის, უნარ-ჩვევების განვითარებაზე, რადგან ახალ ამპლუაში მაყურებლის წინაშე გამოჩენა დიდი გამოწვევა და პასუხისმგებლობაა. დუბაიში ჩემი ყოფნა ზუსტად ახალ საავტორო გადაცემას უკავშირდება, რომელიც უკრაინული არხზე გადის. ეს წინადადება ჩემს ოცნებას უფრო ჰგავდა: საავტორო გადაცემა, წამყვანობა, სრული პროფესიული თავისუფლება და ჩემი ხედვით აწყობილი გადაცემის ფორმატი, ამას დამატებული საინტერესო წარმატებულ ადამიანებთან ურთიერთობა, და რაც ყველაზე მნიშვნელოვანია, გავხდი არაჩვეულებრივი ადამიანების, პროფესიონალების გუნდის წევრი. ჩემი გადაცემის პირველი სეზონი დუბაის ეძღვნება, ახლა კი ვმუშაობთ შემდეგ სეზონზე და პარალელურად რამდენიმე დიდ პროექტზე, რომლის შესახებაც ჯერ ვერაფერს გავამხელ, თუმცა როდესაც მზად იქნება, სიამოვნებით გაგიზიარებთ.
აქ მხოლოდ ჩემი გადაცემის გამო არ ვრჩები, დუბაიში ვმუშაობ ასევე სხვადასხვა არხისთვის, როგორც ფრილანსერი, რადგან დუბაიში უამრავი საინტერესო და გლობალური მნიშვნელობის ღონისძიება იმართება, სადაც მსოფლიოს სხვადასხვა კუთხიდან მოწვეული წამყვანი მეცნიერები, ხელოვანები და წარმატებული ადამიანები იყრიან თავს. საინტერესო მოვლენების ეპიცენტრია აქ და შესაძლებლობა მაქვს, ამ მიმართულებითაც ვაკეთო რეპორტაჟები. ცოტა ხანში გაგიზიარებთ ვრცელ სიუჟეტს ექსპო 2020 დუბაის შესახებ, რომელიც განსაკუთრებულია ბევრი ფაქტის გამო, პირველი გამოფენაა, რომელიც შუა აზიაში ტარდება და მონაწილეთა ასეთი მასშტაბურობით გამოირჩევა. ექსპოზე 193 ქვეყნის პავილიონია წარმოდგენილი და საინტერესო გარემოა რეპორტაჟებისთვის.
ჩავწერე 14 ინტერვიუ, აქედან ჩემდა საბედნიეროდ, მაქვს ექსკლუზიური ინტერვიუებიც. 2 კვირის განმავლობაში ვაწარმოებდი მოლაპარაკებებს, რაშიც „ექსპო 2020 დუბაის“ სინიორ ვიცე პრეზიდენტის, არაჩვეულებრივი ქალბატონის შონას მსგეაჩინის დიდი წვლილიცაა. რაც ძალიან მახარებს, ისაა, რომ მოვამზადეთ ვრცელი სიუჟეტი საქართველოს პავილიონზე, სადაც საინტერესოდ არის წარმოდგენილი ჩვენი ქვეყნის იდენტობა, კულტურა, ტურისტული პოტენციალი. 193 ქვეყანას შორის საქართველო ღირსეულად ვართ წარმოჩენილები. მიხარია, რომ ქართულ არხებთან ვითანამშრომლე და მათი საშუალებით ქართველ მაყურებელს ვრცელი რეპორტაჟების ნახვის საშუალება ჰქონდათ.