„მგონია, რომ ბელა მირიანაშვილი მიწაზე ფეხს არ ადგამდა“ – ქართული სტილის კერპის საღამო ფუნიკულიორზე

0
2292

18 ოქტომბერს, ფუნიკულიორზე თბილისის მოდის კვირეულის მეთვრამეტე სეზონი ქართველი კინოვარსკვლავის, ულამაზესი ბელა მირიანაშვილისადმი მიძღვნილი საღამოთი გაიხსნა. ქართველებისთვის ერთ-ერთი ყველაზე საყვარელი კინომსახიობი სამწუხაროდ, ადრე წავიდა ამ სფეროდან, მაგრამ წარუშლელი კვალი დატოვა ყველაზე, ვინც მისი როლები ფილმში თუ სპექტაკლებში ნახა…

ბელა მირიანაშვილის საღამო ბასა ფოცხიშვილისა და მისი გუნდის რეჟისურით დაიდგა. პროექტის წარმდგენი თბილისის მოდის კვირეულის „სტილის კერპის“ პროექტის ფარგლებში გახლდათ „სოლო“.

ფუნიკულიორის რესტორნის ვერანდაზე გაიმართა გამოფენა, სადაც ბელა მირიანაშვილის ფოტოები გამოიფინა.ქართულად გოგოლა კალანდაძემ და ინგლისურად მსახიობის შვილიშვილმა, ირინკა კავსაძემ, ბელას ცხოვრების ამბავი წაიკითხეს. გოგოლა და ირინკა სწორედ ისე იყვნენ გამოწყობილები, ქურქსა და თავშალში, როგორც ეს ერთ-ერთ ცნობილ ფოტოზეა, რომელიც ბელა მირიანაშვილს მეუღლესთან, კახი კავსაძესთან და ქალიშვილთან, ნანუკა ხუსკივაძესთან ერთად აქვს გადაღებული…

თაკო ჩხეიძე, თბილისის მოდის კვირეულის ორგანიზატორი:

უკვე მეხუთე სეზონია, თბილისის მოდის კვირეული იხსნება ქართველი ლეგენდარული ქალბატონების საღამოებით. ჩვენ გვქონდა ბიბო რამიშვილის, მედეა ჯაფარიძის, სოფიკო ჭიაურელის, ელენე ახვლედიანის საღამოები, ამ საღამოს მთავარი გმირი კი სათაყვანებელი ადამიანი, ბელა მირიანაშვილია. ხვდებით ალბათ, რატომ შეირჩა ფუნიკულიორი ამ ღონისძიებისთვის. ჩვენი სტუმრებისთვის, განსაკუთრებით, საერთაშორისო პრესის წარმომადგენლებისთვის, ძალიან საინტერესოა ასეთი ღონისძიებები. მათ ჩვენ სკულტურას ვაცნობთ. ის ქალბატონები, რომლებიც ჩამოვთვალეთ, მსოფლიო კინემატოგრააფში გამორჩეულები იქნებოდნენ… გული მწყდება, რომ ასე არ მოხდა. საერთაშორისო პრესას ყოველთვის წინასწარ ვაწვდით ხოლმე ინფორმაციას „სტილის კერპის“ გმირების შესახებ.

რაც შეეხება მოდის კვირეულს, მეთვრამეტე სეზონი გაიხსნა და ყველა დღე ერთმანეთისგან განსხვავებული იქნება. იქნება ქართველი დიზაინერების შოურუმი, ჩვენებები და პრეზენტაციები. უამრავი დიზაინერი დაინტერესდა უცხოეთიდანაც და ეს ძალიან მნიშვნელოვანია. ვფიქრობ, საინტერესო სეზონი გელოდება წინ.

ბასა ფოცხიშვილი, რეჟისორი:

მგონია, რომ საღამომ კარგად ჩაიარა. ჩემი აზრით, განსხვავებული და სადა იყო წინა „სტილის კერპებისგან“, რადგან მისი სახე არის რაფინირებული, ნატიფი და ფაქიზი. ფოსტალიონი გოგონა ქართულ კინემატოგრაფში არის სახე, რომელსაც ჩვენთვის სიყვარული, სითბო და სიკეთე მოაქვს.

ნიკა წულუკიძე, ტელეწამყვანი:

ბელას როლებზე რომ ვფიქრობ ქართულ თეატრში, სულ მგონია, რომ ბელა მიწაზე არ ადგამდა ფეხს… როდესაც ის ცუდად გახდა და აღარ შეეძლო სპექტაკლის თამაში, მედიკო კუჭუხიძემ სპექტაკლი გააჩერა, რომ ბელას ეგრძნო, მის გარეშე რაღაცამ შეწყვიტა არსებობა. მართლაც, მის გარეშე მშვენიერების სხივი გაქრა. მახსენდება „ჭინჭრაქაში“ მისი როლი… ისე თრთოდა, როგორც ბალეტის „პაჩკა“. ამიტომ ძალიან მიხარია, როცა სცენაზე ირინკას ვუყურებ. მგონია, ბელას გზა გრძელდება…

დღევანდელი საღამო რით არის მნიშვნელოვანი?

მახარებს ის, რომ ასეთი ადამიანების: ელენე ახვლედიანის, სოფიკო ჭიაურელის, ნინო რამიშვილის გახსენება და პოპულარიზაცია ხდება. ჩვენთვის საყვარელი არტისტები ისევ ცოცხლობენ…

ფოტო: დათუნა აგასი

(ფოტოები/ვიდეო)

LEAVE A REPLY

Please enter your comment!
Please enter your name here