ახალი წელი ახლოვდება და ქართველი მომღერლები, არა მხოლოდ ჩვენს კარგ განწყობაზე ზრუნავენ და ახალ სიმღერებს გვთავაზობენ, არამედ ცდილობენ ბევრ საქველმოქმედო აქციაში ჩაერთონ და დაეხმარონ მათ, ვისაც ეს ყველაზე მეტად სჭირდება. ნინო სურგულაძე იმ ხელოვანთა რიცხვს განეკუთვნება, რომლებიც მხოლოდ საკუთარ თავსა და კარიერაზე არ ფიქრობენ და ცდილობენ საკუთარი წარმატება, სხვების დასახმარებლად გამოიყენონ. მომღერლის დამსახურებით შეიქმნა ფონდი “ნატვრის ხე”, რომელიც უკვე 40-მდე ბენეფიციარს დაეხმარა და ახლა უკვე რიგით მეექვსე საქველმოქმედო კონცერტისთვის ემზადება, რომელიც 28 დეკემბერს ფილარმონიის დიდ საკონცერტო დარბაზში გაიმართება. კონცერტის დეტალებზე სასაუბროდ კი მომღერალი თათა სადრაძის საავტორო გადაცემა “არტ ეფემს” ესტუმრა.