ქეთი ჩხიკვაძის 2020 წლის შემოდგომა-ზამთრის კოლექციის ჩვენება 19 მაისს, „რესპუბლიკაში“ გაიმართება. დიზაინერი მალე საქართველოს დატოვებს და საზღვარგარეთ გადავა საცხოვრებლად, ის საქმიანობას საფრანგეთის დედაქალაქში გააგრძელებს. როგორც თავად ამბობს, 19 მაისის ჩვენების შემდეგ თბილისში გარკვეული პერიოდით კოლექციებს აღარ წარმოადგენს, ამიტომაც მისი მიზანია, რომ ახლანდელი ჩვენება განსაკუთრებული იყოს. ამ საქმეში მას მეგობრები და კოლეგები, ავთანდილი და თამუნა ინგოროყვა ეხმარებიან.
ქეთის მაღაზიაში ვესტუმრეთ ახალი კოლექციის დასათვალიერებლად და ინტერვიუსთვის.
ქეთი:
თბილისში ვაჩვენებ 2020 წლის შემოდგომა-ზამთრის კოლექციას, რომელიც წარმოდგენილი იყო პარიზისა და მილანის შოურუმებში. კოლექციას ვერ ნახავენ უცხოელი სტუმრები, რადგან უკვე დაგვიანებულია, მხოლოდ ქართული საზოგადოებისთვის წარმოვადგენ, თუმცა ფოტოები და კოლექციის მთელი მასალა გაიგზავნება პარიზში და ვისთანაც კომუნიკაცია მაქვს, სავარაუდოდ, ისინიც დაინტერესდებიან მასალის დაბეჭდვით.
ნერვიულობთ?
ჩვენების წინ ყოველთვის ვნერვიულობ. მინდა, ყველაფერი ჩანაფიქრის მიხედვით წარიმართოს.
ყველა ჩვენების წინ მეხმარებიან ჩემი კოლეგები. წარმოუდგენელია, ეს ყოველივე მარტომ აკეთო. ჩემ გვერდით სულ დგანან ავთანდილი და თამუნა ინგოროყვა. მათ გემოვნებას თვალდახუჭული ვენდობი და ფაქტობრივად, ჩვენებისთვის კოლექციის აწყობაში არ ვერევი. ამჯერად ეს თემა საკუთარ თავზე თამუნა ინგოროყვამ აიღო. იმდენი ადამიანი მეხმარება, რომ ალბათ, სირცხვილიც იქნება, ცუდი რომ გამოვიდეს. ყველამ დაასრულა საკუთარი ჩვენეები და ყველა გამოძახებული მყავს სიმაღლის მიხედვით (იცინის). გვანცა ჯანაშია, ლალო, ანუკა ქებურია… მათ პრინციპში ყველაფერი ნანახი აქვთ, თუმცა მთლიანობაში საბოლოო ვერსია სულ სხვა არის ხოლმე. „ლუქბუქს“ სხვა კონცეფცია აქვს და პოდიუმს – სხვა. ჩემთვისაც ახალია, როგორ დავინახავ ხოლმე კოლექციას პოდიუმზე. მიუხედავად იმისა, რომ სოციალურ ქსელებში კოსტიუმები ნანახი გაქვთ, პოდიუმზე სხვანაირად იქნება წარმოდგენილი. ჩვენების ინსტალაცია, ფანტასტიკური მუსიკა შექმნის განსხვავებულ ემოციას.