ლიკა კვარაცხელია და თემო ქაქუჩაია „რუსთავი 2“-ის დილის გადაცემის ახალი ტელეწყვილია სამზარეულოში. ლიკას აქცენტი უფრო მეტად ჯანსაღ და მარტივად მოსამზადებელ რეცეპტებზე აქვს, თემოს კი უფრო მეტად კალორიულზე, მაგრამ ორივე წამყვანი ორიენტირებულია იმაზე, რომ მაყურებელი კულინარიით კიდევ უფრო მეტად დააინტერესოს და მათი დილა უფრო გემრიელი გახადოს.
ლიკა კვარაცხელია:
შეთავაზება „რუსთავი 2“-ის დილის გადაცემის პროდიუსერისგან მივიღე. ჩემთვის ეს შეთავაზება ძალიან მოულოდნელი იყო, არ ველოდი, რომ ამხელა პასუხისმგებლობას დამაკისრებდნენ. იყო ჩემს ცხოვრებაში პერიოდი, როდესაც საკუთარ კულინარიულ გადაცემაზე ვფიქრობდი, თუმცა ეს ცოტა სხვა ფორმატია. პირდაპირი ეთერია, რამდენჯერმე ვართ ეთერში და კერძის მზადების პროცესი სხვანაირად ჩანს. სინჯიდან ძალიან მალე, მეორე დღესვე გვქონდა პირდაპირი ეთერი და ძალიან ვღელავდი, მაგრამ წამყვანებმა შეგვიწყვეს ხელი. ცოტა დრო მჭირდება, რომ ახალი ამპლუა გავითავისო, თუმცა კულინარია ჩემთვის უცხო არ არის, რადგან ძალიან მიყვარს სამზარეულოში ტრიალი. დიდი სიამოვნებით გავდივარ ყოველ სამშაბათს ეთერში.
გემრიელი კერძების მომზადება როგორ ისწავლე ან ვისგან?
მგონი, ჩემით. ჩემი მიმართულებაა მარტივი და გემრიელი კერძების მომზადება. არც ვამზადებ ისეთ კერძებს, სამდღენახევარი რომ სჭირდება, მაქსიმუმ ნახევარი საათი. მაშინ არის სახალისო მზადების პროცესი, როცა არ გბეზრდება.
თემო ქაქუჩაიას შენგან განსხვავებული მიმართულება აქვს. როგორ შეეგუეთ თანაწამყვანობას?
ძალიან კარგად. თემო ძალიან გამოცდილი მზარეულია და მისგან ბევრ რამეს ვისწავლი, თანაც, განაწილებული გვაქვს ჩვენ-ჩვენი მიმართულება. ორი ეთერი არ არის საკმარისი, მაგრამ ვფიქრობ, რაღაც-რაღაცები უკვე კარგად გავიგე.