„18 წლის სიცოცხლით სავსე ბიჭი მარტოდმარტო, გაუნძრევლად წევს, უყურებს ერთსა და იმავე წერტილს…“

0
1602

ჟურნალისტი ნინია ახვლედიანი აქვეყნებს პოსტს, რომელიც გარკვეული პერიოდის წინ ავარიაში მოხვედრილი ავთო კიკნაველიძის ჯანმრთელობის მდგომარეობას ეხება. ის ამჟამად გერმანიის ერთ-ერთ კლინიკაში იმყოფება, თუმცა ოჯახს თანხა მხოლოდ ორი თვის მკურნალობისთვის ეყო…

გთავაზობთ ნინია ახვლედიანის პოსტს:

„…დაიღალა. ენერგია აღარ აქვს… წევს და ფიქრობს.. წარმოიდგინეთ, 18 წლის სიცოცხლით სავსე ბიჭი მესამე თვეა თეთრ პალატაში მარტოდმარტო, გაუნძრევლად წევს, უყურებს ერთსა და იმავე წერტილს და ფიქრობს.. არის პერიოდები იბრძვის, თუმცა არის მომენტები როცა აღარ უნდა ეს ტანჯვა და უარს ამბობს, საკვებზეც კი..

საბედისწერო ავარიიდან, რომელმაც ჩემი შვილის, მისი მეგობრების და ჩვენი ყველას ცხოვრება შეცვალა, 3 თვე გადის…

ავთო ახლა გერმანიაშია. 3 კვირაზე მეტი გავიდა, რაც იქაა. საღ გონებაზეა პირველი დღიდან. ტრაქეოსტომიის გამო ლაპარაკი მხოლოდ ჩურჩულით შეუძლია.. ახალ კლინიკაში ჩასვლისას უკეთეს განწყობაზე იყო, იმედიანად. ჩვენც მასთან ერთად. რეალურად ოდნავი უკეთესობაც იყო, ხელებზე მასაჟებიც კი დაუწყეს. მაგრამ ასეთ დროს შესაძლოა ყოველ წამს რაღაც გართულდეს.

ახლა ავთუკა ფილტვების ანთებას ებრძვის. ინფექციების და ანთების გამო რეანიმაციაშია გადაყვანილი. ნევროლოგიის გარდა, თავი იჩინა უამრავმა პრობლემამ. უჭირს ყლაპვა. დაიკლო ძალიან ბევრი…

გერმანელ ექიმებს ჯერ კიდევ არ შეუძლიათ ზუსტი პროგნოზის გაკეთება, თუმცა ყველა თანხმდება იმაზე, რომ მინიმუმ 6 თვიანი მკურნალობის შემდეგ გამოიკვეთება რეალური სურათი.

ახლა რეანიმაციაში ავთოსთან დედას დღეში სამჯერ უშვებენ. ავთოს იქ სამწუხაროდ არ ჰყავს თავისი საყვარელი, ყოვლისშემძლე მეგობრები, რომლებიც ამ განსაცდელის დროს მუდმივად ახალისებდნენ და ბრძოლის ძალას მატებდნენ. ისინი ახლა აქედან ცდილობენ ტელეფონით და ვიდეოქოლებით მისცენ ისევ ის ენერგია, რომელმაც უნდა გაიმარჯვოს.

თუკი რამე კანონზომიერება არსებობს ამქვეყნად, ავთუკამ ეს გართულებაც უნდა დაამარცხოს და მალე მეგობრებს დაუბრუნდეს.

ძალიან ბევრი ადამიანი მეკითხებოდა ბოლო დროს ავთოს შესახებ და გადავწყვიტე კიდევ ერთხელ გამეზიარებინა თქვენთვის მისი ახლანდელი მდგომარეობა.

დიდი მადლობა ყველას, მართლა უდიდეს თანადგომას ვგრძნობთ!

ჩვენს საყვარელ ბიჭს ისევ სჭირდება ჩვენი თანადგომა. გერმანიის კლინიკაში ჯერ მხოლოდ 2 თვის მკურნალობის თანხა გვაქვს გადახდილი. შედეგისთვის მინიმუმ 6 თვეა საჭირო. ვაპირებთ ისევ აქციების გაგრძელებას.

მალე დავაანონსებთ ცნობილი ქართველი მხატვრების აუქციონს.თუ ვინმეს გაქვთ სურვილი შეიტანოთ წვლილი ავთოსთვის გამართულ აუქციონში, ნამუშევრებს მე-6 საავტორო სკოლაში ვაგროვებთ.

უმორჩილესად გთხოვთ, ვისაც როგორ შეგიძლიათ, გავერთიანდეთ18 წლის მზისფერი ბიჭის გადასარჩენად. ყველაფერი ვცადოთ, რომ მდგომარეობიდან გამოვიდეს და ფეხზე დადგეს, ან თუნდაც ეტლით, ჩვენს გვერდით გააგრძელოს ცხოვრება.

დახმარების მსურველებს კიდევ ერთხელ შეგახსენებთ ანგარიშის ნომრებს:

საქართველოს ბანკი, საბანკო კოდი BAGAGE22.

ანგარიშის ნომერი: GE44BG0000000035929400

(საშუამავლო ბანკები: Commerzbank Frankfurt, Germany; SWIFT: COBADEFF. Citibank N.A. New York, USA; SWIFT: CITIUS33),

თიბისი ბანკი, საბანკო კოდი TBCBGE22.

ანგარიშის ნომერი: GE59TB7465345062100003.

მიმღები – მერაბ კიკნაველიძე

დასახელებაში უმჯობესია მიუთითოთ “ავთოსთვის”.

ძალიან გთხოვთ, ახლაც გავერთიანდეთ #ავთოსთვის“

LEAVE A REPLY

Please enter your comment!
Please enter your name here